Načalnik milicyi patłumačyŭ brutalnaje zatrymańnie studentaŭ kłopatam pra «prostych hramadzian»
Namieśnik načalnika HUUS Minharvykankama — načalnik milicyi hramadskaj biaśpieki Ivan Kubrakoŭ prakamientavaŭ u efiry telekanała ANT žorstkaje zatrymańnie studentaŭ u minskim tralejbusie paśla «Maršu niedarmajedaŭ» 15 sakavika.
«Nie budu całkam raskryvać usie karty, — kazaŭ aficer Kubrakoŭ, — ale ŭ toj situacyi supracoŭniki orhanaŭ unutranych spraŭ dziejničali takim čynam, kab dadzienyja pravaparušalniki, jakija znachodzilisia ŭ tralejbusie, nie mahli i nie mieli fizičnaj mahčymaści nanieści škodu prostym hramadzianam. My ŭsie vydatna bačyli, jakija pradmiety byli kanfiskavanyja (u pravaparušalnikaŭ). Heta pradmiety, pryznačanyja dla naniasieńnia cialesnych paškodžańniaŭ: i nažy, i kastety, i, naturalna, maski», — cytuje Kubrakova BiełTA.
Aktyvistaŭ anarchisckaha ruchu zatrymlivali ŭ transparcie pa darozie z akcyi.
Adznačym, što ŭ časie šeścia jany ŭvieś čas byli na vačach u žurnalistaŭ i ničoha nie parušali. Anarchisty z barabanami byli samymi aktyŭnymi ŭdzielnikami akcyi. Jany ładzili viasiołyja muzyčnyja pierformansy. Na vačach u demanstrantaŭ paśla šeścia jany sieli ŭ tralejbus, adnak źjechali niedaloka.
Na prypynku nasuprać kazino «Biełaja vieža» pa vulicy Maksima Bahdanoviča ludzi ŭ cyvilnym pačali ŭryvacca ŭ tralejbus, brutalna vyciahvać aktyvistaŭ, raspylili ślozaciečny haz.
Žychar Minska Piatro Markiełaŭ strymiŭ videa zatrymańnia — zatrymali i jaho.
A na nastupnym videa vy možacie bačyć, jak tyja samyja «prostyja hramadzianie» — žančyny na prypynku — sprabujuć abaranić junakoŭ ad cicharoŭ:
«Skacina, za što bješ? Fašysty niedabityja! Za našy padatki!» — kryčać na cicharoŭ žančyny na prypynku, ale marna.
Čamu YouTube vydaliŭ kanały BiełTA, STB i ANT? Voś što viadoma11
Kamientary