List Mininfa «Našaj Nivie»: «Piedahohi z zadavalnieńniem nabyli dastupnyja dla ich bilety na kancert Dźmitryja Charaćjana»

Redakcyja «Našaj Nivy» atrymała list ad Ministerstva infarmacyi. U im ministr Lilija Ananič spasyłajecca na kalektyŭny zvarot maładziečanskich nastaŭnikaŭ. Jany abviarhajuć źviestki, vykładzienyja ŭ dopisie našaj čytački.

Volha Zaleskaja śćviardžała, što nastaŭnikaŭ Maładziečna prymusova zahaniali na tvorčy vystup rasijskaha artysta Dźmitryja Charaćjana:

«Nastaŭniki horada i rajona vymušany byli zapoŭnić zału pałaca i takim čynam dać zarabić artystu. Usio jano ničoha, kab dobraachvotna išli ludzi na viečar. Nastaŭniki byli vymušanyja iści. A zapoŭnić zału takim čynam vyrašyli kiraŭnictva pałaca i adździeł adukacyi. A jak ža inakš, dobry sposab apłačvać hastroli rasiejskich artystaŭ».

Z Maładziečna ž u Mininfa paviedamili, što maładziečanskija nastaŭniki ž zapeŭnili, što pajšli na tvorčy vystup dobraachvotna: «Piedahohi razam ź siabrami, siemjami z zadavalnieńniem nabyli dastupnyja dla ich bilety na kancert Narodnaha artysta RF Dźmitryja Charaćjana».

Sa svajho boku, my nie majem padstaŭ nie daviarać našaj čytačcy, jakoj bilet dastaŭsia «dobraachvotna-prymusova».

Dadamo, što va ŭmovach ekanamičnaha kryzisu dobraachvotna-prymusovy ŭdzieł biudžetnikaŭ u hastrolach zamiežnych artystaŭ — heta jašče i vymyvańnie valuty z krainy, ad čaho nieadnarazova zaścierahała kiraŭnictva krainy.

Padajom tut poŭny tekst lista Ministerstva infarmacyi.

* * *

Pra raspaŭsiud infarmacyi

2 lutaha 2017 hoda na infarmacyjnym resursie nn.by byŭ apublikavany artykuł «Nie viešať nos, hardiemariny!» Nastaŭniki Maładziečna padtrymali materyjalna artysta Charaćjana», u jakim źmiaščajecca nastupnaja infarmacyja:»… Nastaŭniki horada i rajona vymušanyja byli zapoŭnić zału pałaca i takim čynam dać zarabić artystu. Usie jano ničoha, kali b dobraachvotna išli ludzi na viečar. Nastaŭniki byli vymušanyja iści. A zapoŭnić zału takim čynam vyrašyła kiraŭnictva pałaca i adździeł adukacyi».

U adpaviednaści z kalektyŭnym zvarotam vykładčykaŭ arhanizacyj adukacyi h. Maładziečna, jaki pastupiŭ na adras Ministerstva infarmacyi, źviestki, vykładzienyja ŭ vyšejnazvanym artykule, nie adpaviadajuć rečaisnaści. Aŭtary zvarotu paviedamlajuć, što DU «Pałac kultury h. Maładziečna» pravodziŭ akcyju, jakaja praduhledžvaje nabyćcio dvuch kvitkoŭ pa košcie adnaho. U suviazi z hetym piedahohi razam ź siabrami, siemjami z zadavalnieńniem nabyli dastupnyja dla ich bilety na kancert Narodnaha artysta RF Dźmitryja Charaćjana.

Zhodna z punktam 2 artykuła 3 Zakona Respubliki Biełaruś ad 17 lipienia 2008 hoda «Ab srodkach masavaj infarmacyi» (dalej — Zakon ab ŚMI) jaho dziejańnie, za vyklučeńniem patrabavańniaŭ ab dziaržaŭnaj rehistracyi srodkaŭ masavaj infarmacyi, raspaŭsiudžvajecca na infarmacyjnyja resursy (ich składovyja častki), raźmieščanyja ŭ hłabalnaj kampjutarnaj sietcy Internet, z dapamohaj jakich ažyćciaŭlajecca raspaŭsiudžvańnie pradukcyi srodku masavaj infarmacyi.

U adpaviednaści z abzacam druhim artykuła 4 Zakona ab ŚMI srodki masavaj infarmacyi pavinny raspaŭsiudžvać infarmacyju, što adpaviadaje rečaisnaści.

Akramia taho, padpunktami 4.2 i 4.3 punkta 4 artykuła 34 Zakona ab ŚMI pradpisana, što žurnalist srodku masavaj infarmacyi abaviazany praviarać dakładnaść atrymanych im źviestak, a taksama pradastaŭlać dla raspaŭsiudžvańnia dakładnuju infarmacyju.

Na padstavie vykładzienaha Ministerstva infarmacyi patrabuje praanalizavać pradstaŭlenuju infarmacyju i zabiaśpiečyć niaŭchilnaje vykanańnie pradpisańniaŭ Zakona ab ŚMI.

• 0
• 0
• 0
• 0
• 0
• 0
• 0
• 0