Va Ukrainie prapanavali admianić vychadnyja na 8 sakavika i 1 maja

U Viarchoŭnaj Radzie Ukrainy pavinien źjavicca zakonaprajekt «Ab dziaržaŭnych i inšych śviatach, pamiatnych datach i žałobnych dniach Ukrainy». Takuju infarmacyju ahučyŭ dyrektar Ukrainskaha instytuta nacyjanalnaj pamiaci Uładzimir Viatrovič, pieradaje Radyjo Svaboda.

Pavialičyć

Zhodna z prajektam, 8 sakavika prapanujuć pazbavić statusa śviatočnaha vychadnoha dnia, hetak ža pastupić i z 1 maja. A voś vychadny 9 maja pieranieści na 8 maja, kab razam ź Jeŭropaj šanavać pamiać zahinułych u Druhoj suśvietnaj vajnie. Tak va Ukrainie praciahvajuć uziaty na dekamunizacyju kurs, adznačaje Viatrovič.

U cełym płanujuć pamienšyć kolkaść dziaržaŭnych śviatočnych vychadnych z 11 da 9. Na dziaržaŭnym uzroŭni pavinny adznačacca tyja śviaty, jakija aznačajuć važnyja padziei dla Ukrainy, a nie tyja, jakija zastalisia ad savieckaha minułaha, ličyć dyrektar Ukrainskaha instytuta nacyjanalnaj pamiaci.

Paśla taho, jak prajekt zakona projdzie hramadskaje abmierkavańnie, jaho razhledziać i padpraviać u Kabiniecie ministraŭ, a dalej nakirujuć u Radu. Viatrovič pierakanany, što padtrymka ŭ parłamiencie budzie.

«Toje, što hetyja śviaty źjaŭlajucca vychadnymi — heta čysta savieckaja tradycyja. I ŭ hetym lohka pierakanacca, kali pahladzieć, u jakich krainach heta da hetaha času adznačajecca. 8 sakavika źjaŭlajecca vychodnym tolki ŭ kala 15 krainach śvietu. Zatoje dla taho, kab pravodzić dzień ź siamjoj, my prapanujem uvieści Dzień siamji i vychadny kožnaj druhoj piatnicy vieraśnia. 2 maja — heta ŭvohule ŭkrainskaje noŭ-chaŭ, tamu što ŭ hety dzień niama nijakaha śviata. Što tyčycca 1 maja, Dnia salidarnaści pracoŭnych, niahledziačy na toje, što jon adznačajecca ŭ vialikaj kolkaści krain, tolki ŭ postsavieckich dziaržavach jon źjaŭlajecca vychadnym», — rastłumačyŭ jon.

U Instytucie nacyjanalnaj pamiaci prapanujuć uzamien dadać takija vychadnyja: Šaŭčenkaŭ dzień (9 sakavika), Dzień siamji (druhaja niadziela vieraśnia). A taksama admovicca ad praktyki pieranosu śviataŭ, kali jany vypadajuć na subotu i niadzielu (akramia Novaha hoda, Rastva i Vialikadnia). U cełym ža kolkaść dziaržaŭnych śviatočnych vychadnych na hod chočuć skaracić z 11 da 9. Kali ž nie admianić, to 11 dziaržaŭnych śviatočnych vychodnych u Ukrainie pieratvarajucca ŭ 15-20, adznačaje Viatrovič.

U kamitecie Viarchoŭnaj Rady pa pytańniach kultury i duchoŭnaści hatovyja razhladzieć prajekt maksimalna chutka, jak tolki jon pastupić, adznačaje jaho kiraŭnik Mikałaj Kniažycki.

«Ja tut nie baču naohuł vialikich prablem abo katastrof. Što tyčycca śpiekulacyj adnosna taho, što niechta prapanuje nie śviatkavać Dzień pieramohi, to havorka idzie pra pieranos vychadnoha dnia i ŭšanavańnia achviar Druhoj suśvietnaj vajny tolki na adzin dzień, razam ź Jeŭropaj, z 9 na 8 maja. Pa admienie vychadnych na 8 sakavika i 1 maja — nie baču nijakaj katastrofy. Chto choča heta rabić, majuć poŭnaje prava. Ale heta nie zusim śviatočnyja dni, u našaj tradycyi jany stali śviatočnymi. 8 sakavika — heta Dzień salidarnaści i baraćby za pravy žančyn. Za hetyja važnyja rečy možna zmahacca pastajanna, 8 sakavika taksama, i nie abaviazkova ŭ hety dzień pić harełku i nie chadzić na pracu. Toje ž tyčycca i 1 maja», — adznačaje jon.

• 0
• 0
• 0
• 0
• 0
• 0
• 0
• 0