Utrymańnie škodnych rečyvaŭ u atmaśfiernym pavietry Minska ŭ ciapierašni čas pieravyšaje miežava dapuščalnyja kancentracyi ŭ 2-2,5 razu. Hetym i abumoŭleny ŭstojlivy pach haru, na jaki skardziacca mnohija minčanie, paviedamiła načalnik infarmacyjna-analityčnaha adździeła manitorynhu atmaśfiernaha pavietra Hidramieta Bahdana Kaziaruk.
«U nas skłalisia vielmi niespryjalnyja mieteaŭmovy: paśla mocnaha paŭnočnaha vietru, jaki zabiaśpiečyŭ dobruju jakaść pavietra na śviaty, u minułyja sutki ŭstalavaŭsia štyl i nazirajucca pryziemnyja inviersii. Heta pryvodzić da taho, što z uskrain stalicy pastupaje zabrudžanaje pavietra», — skazała Kaziaruk.
Pavodle jaje słoŭ, žychary Minskaha rajona ŭ suviazi z chałodnym nadvorjem intensiŭna aciaplajuć svaje damy. Piačny dym u suviazi z tym, što za horadam bolš nizkija tempieratury, «uciahvajecca ŭ Minsk». «I pieršym heta adčuŭ mikrarajon Uručča», — dadała śpiecyjalist.
Svaju leptu ŭ zabrudžvańnie ŭnosiać i pramysłovyja pradpryjemstvy Minska. Dla vyklučeńnia jašče bolšaha zabrudžvańnia Hidramiet razasłaŭ bujnym pramysłovym i transpartnym pradpryjemstvam stalicy papiaredžańni. Dola zabrudžvańnia ad pradpryjemstvaŭ horada dasiahaje 80%, adznačyła Kaziaruk.
Śpiecyjalisty raźličvajuć, što smoh u Minsku źniknie blizu čaćviarha, 12 studzienia. «Čakajecca źmiena sinaptyčnaj situacyi, uzmacnieńnie vietru, i hetaja źjava źniknie, pavietra ačyścicca», — prahnazuje načalnik adździeła.
Kamientary