U centralnym aparacie Śledčaha kamiteta Biełarusi zaviaršyłasia rasśledavańnie kryminalnaj spravy ab napadzie byłoha studenta MIPSA na ludziej u minskim handlovym centry «Novaja Jeŭropa».
Jak paviedamiŭ načalnik adździeła infarmacyi i suviaziaŭ z hramadskaściu SK Siarhiej Kabakovič, dziejańni abvinavačvanaha kvalifikavanyja pa č. 1 art. 13 i č. 2 art. 139 KK (padrychtoŭka da zabojstva dvuch i bolš asob), č. 1 art. 14 i č. 2 art. 139 KK (zamach na zabojstva dvuch i bolš asob), č. 2 art. 139 KK (zabojstva, učynienaje z asablivaj žorstkaściu z chulihanskich pamknieńniaŭ), č. 1 art. 339 KK (chulihanstva).
Pavodle źviestak śledstva, 8 kastryčnika 2016 hoda kala 17.30 chłopiec, znachodziačysia ŭ stanie ałkaholnaha apjanieńnia, zajšoŭ u handlovy centr «Novaja Jeŭropa» z čachłom dla muzyčnaha instrumienta, zaviedzienaj i hatovaj da ŭžyvańnia bienzapiłoj. Padletak vybiraŭ abjekty dla napadu siarod rabotnikaŭ i naviedvalnikaŭ handlovaha centra. Pieršaj jon pasprabavaŭ zabić žančynu, adnak taja zmahła chutka zreahavać i ŭciačy. Druhoj žančynie 1973 hoda naradžeńnia chłopiec nanios dva ŭdary bienzapiłoj. Paśla taho jak bienzapiła zahłuchła z-za taho, što ŭ łancuh patrapiła adzieńnie paciarpiełaj, napadnik dastaŭ z čachła ad hitary siakieru-kuvałdu i nanios žančynie ŭdary, ad jakich jana pamierła na miescy zdareńnia.
Zatym abvinavačvany, praciahvajučy pieramiaščacca pa handlovym centry, pryčyniŭ cialesnyja paškodžańni roznaj stupieni ciažaru dźvium žančynam, jakim paźniej była akazanaja kvalifikavanaja miedycynskaja dapamoha. Paciarpiełymi pa kryminalnaj spravie pryznanyja try žančyny, a taksama svajaki zahinułaj.
Praź niepraciahły čas chłopiec byŭ zatrymany rabotnikami i naviedvalnikami handlovaha centra, a taksama prybyŭšymi supracoŭnikami milicyi.
Padčas śledstva taksama ŭstanoŭleny fakt padrychtoŭki abvinavačvanym zabojstva dvuch i bolš asob 7 kastryčnika 2016 hoda ŭ adnoj sa staličnych VNU.
Niepaŭnahadovy, znachodziačysia ŭ stanie ałkaholnaha apjanieńnia, zajšoŭ u navučalny korpus i zavioŭ bienzapiłu. Dalej jon źbiraŭsia zajści ź joj i siakieraj-kuvałdaj u lekcyjnuju aŭdytoryju, u jakoj u hety čas zajmalisia 178 studentaŭ, z metaj napadu na ich. Davieści svoj namier da kanca chłopiec nie zmoh, bo vypadkova zakranuŭ ryčah tormazu bienzapiły, u vyniku čaho spyniŭsia łancuh. Sproby zavieści bienzapiłu byli niaŭdałymi, što vymusiła jaho pakinuć terytoryju VNU.
Padčas śledstva dapytana kala 200 śviedak, praviedzienyja dziasiatki ekśpiertnych daśledavańniaŭ. Daśledavanaja asoba abvinavačvanaha. Dapytanyja jaho adnakłaśniki, nastaŭniki, adnahrupniki, vykładčyki i inšyja asoby.
Zhodna z zaklučeńniem stacyjanarnaj kompleksnaj psichołaha-psichijatryčnaj ekśpiertyzy niepaŭnahadovy ŭ pieryjad inkryminavanych jamu dziejańniaŭ moh u poŭnaj miery ŭśviedamlać značeńnie svaich dziejańniaŭ i kiravać imi.
Miera strymańnia ŭ dačynieńni da abvinavačanaha zastajecca raniejšaj — znachodžańnie pad vartaj.
Kryminalnaja sprava pieradadzienaja prakuroru dla nakiravańnia ŭ sud.
Jak paviedamlałasia raniej, chłopiec chacieŭ być zabitym pry zatrymańni. Jaho metaj było zabojstva jak maha bolšaj kolkaści ludziej. Dva hady tamu napadnik prachodziŭ lačeńnie ŭ psichijatryčnym dyspansiery. Raniej sudzimy nie byŭ. Z zabiaśpiečanaj siamji, ale baćki nie pražyvajuć razam i, pa sutnaści, vychavańniem dziciaci nie zajmalisia. Baćka žyvie asobna ad syna ŭ Minsku, maci i siastra — za miažoj.
Svaju vinu ŭ złačynstvie ŭ «Novaj Jeŭropie» 17-hadovy Uładzisłaŭ Kazakievič pryznaŭ. Matyvam, pavodle jaho słoŭ, stała rasčaravańnie ŭ samim sabie, ahida da čałaviectva, depresiŭny nastroj.
U intervju prahramie «Hałoŭny efir» telekanała «Biełaruś 1» 16 kastryčnika baćka Uładzisłava skazaŭ, što ŭ syna byli kompleksy praź źniešnaść i vuhry. Minułym letam chłopcu byli pryznačanyja novyja leki, jakija i mahli paŭpłyvać na jaho psichičny stan.
U vice-śpikierki Kaardynacyjnaj rady Lizaviety Prakopčyk sabrałasia $12 tysiač daŭhoŭ106
Kamientary