Deputaty admovilisia viartać u staž dla naličeńnia piensii słužbu ŭ armii, dekret i vučobu ŭ VNU
Pastajannaja kamisija pa pracy i sacyjalnych pytańniach admoviłasia inicyjavać viartańnie ŭ staž dla naličeńnia piensij čas słužby ŭ armii, znachodžańnia ŭ dekretnym adpačynku i vučoby ŭ VNU.
Jak paviedamiła staršynia kamisii Tamara Krasoŭskaja ŭ adkaz na zvarot u parłamient hrupy hramadzian, u strachavy staž dla naličeńnia pracoŭnaj piensii ŭklučajecca tolki praca z vypłataj abaviazkovych strachavych uznosaŭ u biudžet dziaržaŭnaha pazabiudžetnaha fondu sacyjalnaj abarony nasielnictva,
«Što datyčycca zaliku ŭ strachavy staž pieryjadaŭ prachodžańnia terminovaj voinskaj słužby, inšaj dziejnaści biez vypłaty ŭznosaŭ (pry hetym u šerahu vypadkaŭ z atrymańniem sacyjalnych vypłat: dapamoh pa biespracoŭi, pa dohladzie dziaciej abo invalidaŭ), to heta aznačała b pamianšeńnie patrabavanaha pieryjadu vypłaty ŭznosaŭ dla ŭźniknieńnia prava na pracoŭnuju piensiju pa ŭzroście na ahulnych padstavach», — havorycca ŭ adkazie Krasoŭskaj.
«Va ŭmovach realizacyi mier, nakiravanych na strymlivańnie rostu raschodaŭ na piensii nasielnictvu, jakoje stareje, takija prapanovy nie mohuć być padtrymanyja», — upeŭniena deputat. Krasoŭskaja taksama adznačaje, što baćkam dziaciej-invalidaŭ, šmatdzietnym maci, invalidam ź dziacinstva i inšym sacyjalna słabym katehoryjam, dla jakich farmiravańnie praciahłaha strachavoha stažu abjektyŭna ciažkaje, zachoŭvajecca lhota pa praciahłaści nieabchodnaha strachavoha stažu na pracoŭnuju piensiju (nie mienš za piać hadoŭ).
Jak paviedamiŭ BiełaPAN pieršy namieśnik BSDP (Hramada) Ihar Barysaŭ, padčas parłamienckich vybaraŭ u vieraśni aktyvisty partyi ŭ Mahilovie sabrali bolš jak 70 podpisaŭ hramadzian pad patrabavańniem uliku ŭ stažy dla naličeńnia piensij času słužby ŭ armii, znachodžańnia ŭ dekretnym adpačynku, dohladzie invalida i vučoby ŭ VNU.
Barysaŭ rasceńvaje adkaz deputata jak raźviančańnie mifa pra Biełaruś jak sacyjalnuju dziaržavu. «Našy ŭłady nie dumajuć pra svoj narod, tamu što jość takoje paniaćcie, jak hramadska-karysnaja praca. Heta, naprykład, słužba ŭ armii. Ludzi addajuć dziaržavie hady svajho žyćcia, i dziaržava pavinna stvarać umovy dla ludziej, tamu što ŭ vypadku jakoj-niebudź niebiaśpieki jany pojduć addavać žyćcio za radzimu. Dziaržava taksama pavinna być zacikaŭlenaja, kab jaje hramadzianie byli vysokaadukavanymi śpiecyjalistami. A tut atrymlivajecca, što čatyry-piać hadoŭ vučoby ŭ VNU vykraśleny sa stažu. Uźnikaje pytańnie: a ci patrebnyja dziaržavie adukavanyja ludzi», — zajaviŭ jon.
Niaŭžo dziaržavie nie patrebny pryrost nasielnictva i kab žančyny, jakija naradžajuć, atrymlivali prefierencyi, zadajecca pytańniem apazicyjny palityk. «A kali ludzi dahladajuć invalidaŭ i heta nie idzie im u strachavoj staž, to heta niespraviadliva. Tamu treba kanstatavać, što takoje paniaćcie, jak spraviadlivaść, adsutničaje ŭ našaj dziaržavie, i śćviardžeńnie, što Biełaruś — sacyjalnaja dziaržava — heta mif», — robić vysnovu Ihar Barysaŭ.
U 2016 hodzie dla bolšaści katehoryj rabotnikaŭ dla atrymańnia prava na pracoŭnuju piensiju nieabchodna mieć 15,5 hoda strachavoha stažu.
U archivach SBU znajšlisia dakumienty, jak savieckija śpiecsłužby zavierbavali emisara AUN, ale ŭkrainskaje padpolle heta vykryła i zabiła zdradnika88
Kamientary