Žychar Kalininhrada — u try razy bahaciejšy za žychara Litvy. Uzrovień žyćcia ŭ Kalininhradskaj vobłaści Rasii — vyšejšy, čym u Litvie. Pra heta napisana ŭ brašurach, jakija žychary Vilni znachodziać u svaich paštovych skryniach. Tak rasijskaja ambasada sprabuje ažyvić prahramu pa pierasialeńni suajčyńnikaŭ na histaryčnuju radzimu, piša DELFI.
Na minułym tydni vilenčuki pačali znachodzić u paštovych skryniach ulotki z nadpisam «Rasija» i rasijskim ściaham.
U papiarovych brašurach byli paznačanyja spasyłki na internet-sajty, kantaktnaja infarmacyja rasijskaj ambasady, i tablicy, u jakich — paraŭnańnie niekatorych cen u Litvie i Kalininhradskaj vobłaści. Da prykładu, 1 kVt·h elektraenierhii ŭ Litvie kaštuje 0,12 jeŭra, u Rasii — 0,04 jeŭra. Paraŭnoŭvajucca i ceny na bienzin: u Litvie litr kaštuje kala jeŭra, a ŭ Rasii — 0,5 jeŭra.
Akramia taho, pakazana, što ŭ Kalininhradzie mienš pryjdziecca płacić za kamunalnyja pasłuhi — 70 jeŭra ŭ samy chałodny miesiac, a ŭ Litvie — 280 jeŭra. Śćviardžajecca, što ceny na tavary pieršaj nieabchodnaści ŭ Litvie u dva razy vyšejšyja, a pry tym, što siaredniaja zarpłata statystyčnaha žychara Litvy vyšejšaja — kala 500 jeŭra, a ŭ Rasii — 430 jeŭra, u Litvie pakupnickaja zdolnaść nižejšaja.
I narešcie, kanstatujuć, što na siamju z 4 čałaviek, jakaja žyvie ŭ 3-pakajovaj kvatery, paśla vypłaty padatkaŭ zastajecca 310 jeŭra, a ŭ Litvie — usiaho 120 jeŭra. Tak vyśviatlajecca, što kalininhradcy nibyta ŭ try razy bahaciejšyja, uzrovień žyćcia ŭ ich u 3 razy vyšejšy. Na inšaj staroncy paraŭnoŭvajucca statystyčnyja dadzienyja ŭžo nie Litvy i Kalininhradskaj vobłaści, a Litvy i Rasii, tolki čamuści za roznyja hady. Tut znoŭ možna znajści spasyłki na infarmacyjnyja kanały, naprykład, «Sputnik», RT i inš.
U litoŭskich ekanamistaŭ takija vysnovy vyklikali ŭśmiešku. Da prykładu, starejšy ekanamist Swedbank Nieryjus Mačulis nazvaŭ dadzienyja vybaračnaj statystykaj, jakaja da taho ž niedakładnaja.
«Heta nazyvajecca «jak chłusić z dapamohaj statystyki». Paraŭnańnie cen vybaračnaje — elektraenierhija i paliva ŭ Rasii tańniejšyja, bo Rasija nie abkładaje ich padatkami. Jašče mahli dadać, što našmat tańniejšyja cyharety i ałkahol. Ale chiba ŭ hetym ščaście? Ciapier z-za padzieńnia rubla ŭ Rasii amal niemahčyma kupić impartnyja tavary, prychodzicca zdavolvacca nievialikim miascovym asartymientam i horšaj jakaściu», — skazaŭ Mačulis.
Jon padkreśliŭ, što ŭ tablicach skažonaja i statystyka zarobkaŭ, bo ŭ Litvie siaredni zarobak nie 500, a 600 jeŭra.
Miž tym starejšy ekanamist banka Nordea Žyhimantas Maŭrycas adznačyŭ, što, niahledziačy na paraŭnańnie Litvy i Kalininhradskaj vobłaści, u tablicy pryviedzienyja siarednija dadzienyja pa Rasii.
I jany niasłušnyja, naprykład, zarpłata dajecca nie «na ruki», a «na papiery», a ŭ Kalininhradskaj vobłaści zarpłata nižejšaja za siaredniuju pa Rasii. Mačulis adznačyŭ, što nie pakazanaja i minimalnaja zarpłata, jana ŭ Litvie 380 jeŭra, ale ŭ Rasii — heta 100 jeŭra.
«Jany manipulujuć dadzienymi, nie pakazvajuć hod, krynicu. Heta jak paraŭnoŭvać jabłyki z apielsinami. A śćviardžać, što ŭ Kalininhradzie ŭzrovień žyćcia ŭ try razy vyšejšy, naohuł niapravilna. Bo litoŭcy taksama mohuć paraŭnać niekatoryja pakazčyki i pa ich, da prykładu, u nievialikim miastečku, apiaredžvać navat skandynavaŭ. Ale my tak nie paraŭnoŭvajem, dy i ruskija nie paraŭnoŭvajuć, da prykładu, sa skandynavami», — skazaŭ Maŭrycas. Praŭda, jon dadaŭ, što ŭ lubym vypadku Litvie treba pastaracca i vyrašać sacyjalnyja, ekanamičnyja vykliki. Akramia taho, pa słovach Mačulisa, niahledziačy na toje, što Kreml pryciahnuŭ niamała emihrantaŭ ź biednych krain SND, sama ž Rasija pakutuje ad «uciečki mazhoŭ» — samyja razumnyja i zdolnyja jeduć za miažu.
Ambasada Rasii pryznała, što heta jana raspaŭsiudžvaje brašury. Heta častka dziaržaŭnaj prahramy pa akazańni sadziejničańnia dobraachvotnamu pierasialeńniu ŭ Rasijskuju Fiederacyju suajčyńnikaŭ, jakija pražyvajuć za miažoj, zaćvierdžanaj Uładzimiram Pucinym u 2006 hodzie. Rasija adznačyła, što tolki ŭ 2014 hodzie z roznych krain u Rasiju pryjechali 106 000 čałaviek. Z pačatku realizacyi prahramy ŭ Rasiju pryjechali 255 000 čałaviek. U Kalininhradskuju vobłaść pryjechali 36 000 čałaviek, a kala 6000 ź ich — u hetym hodzie.
Pracaŭnica ambasady skazała, što prahrama paśpiachova ažyćciaŭlajecca, ruskija Litvy taksama ŭvachodziać u zonu ŭvahi. Praŭda, pavodle statystyki, u Litvie hetaja prahrama paciarpieła fijaska. Usiaho ŭ Rasiju zachacieli źjechać kala 180 čałaviek, pałova ź ich źjechała. Ale ŭ toj ža čas, dziasiatki rasijan źviarnulisia z prośbaj dać im prytułak u Litvie, 8 čałaviek atrymali jaho.
Vykładčyk Instytuta mižnarodnych adnosinaŭ i palityčnych navuk Nieryjus Malukiavičus pierakanany, što hetaja prahrama vielmi simvaličnaja. «Svojeasablivaja chamieleonskaja palityka, z adnaho boku, byccam jość takija prahramy na papiery, z druhoha — jany nie patrebnyja, nie treba, kab ruskija viartalisia, Pucinu i Kramlu treba, kab jany zastalisia, tam, dzie znachodziacca i vyrašali peŭnyja hieapalityčnyja zadačy. Zirnicie na Krym, kali arhumientam było, što ŭsio robicca dziela dabra ruskamoŭnych, dziela ich abarony, dziela viartańnia ich u Rasiju», — skazaŭ palitołah.
Ciapier čytajuć
Čamu amierykancy tak irvucca na Miesiac, što tam buduć zdabyvać? I što da taho biełarusam? Tłumačyć biełaruski astrafizik5
Kamientary