Kamisija ŭrada Rasii ŭchvaliła zakonaprajekt, jaki dazvalaje rasijskim vajskoŭcam terminovaj słužby i rasijanam, jakija znachodziacca ŭ zapasie, zaklučać karotkaterminovyja kantrakty na słužbu za miažoj. Meta zakonaprajekta — chutčej kamplektavać rasijskija vajennyja čaści, jakija znachodziacca za miažoj.
Nieabchodnaść takoha kroku ŭ zakonaprajekcie tłumačycca nieabchodnaściu zmahacca ź mižnarodnymi terarystyčnymi i ekstremisckimi arhanizacyjami.
Terminavik, jaki rychtujecca da demabilizacyi, ci słužačy zapasu ŭžo ciapier moža zaklučyć ź ministerstvam abarony kantrakt na termin ad dvuch hadoŭ. Novy zakonaprajekt prapanuje dazvolić zaklučeńnie bolš karotkich kantraktaŭ terminam ad šaści miesiacaŭ da hoda, jakija buduć dziejničać «tolki ŭ pieryjad nadzvyčajnych abstavin».
Z punktu hledžańnia vajennych heta nieabchodna «dla apieratyŭnaha vyrašeńnia karotkaterminovych, ale važnych zadač, źviazanych z udziełam u apieracyjach pa spynieńni dziejnaści terarystyčnych i ekstremisckich arhanizacyj».
Nadzvyčajnymi abstavinami pry hetym ličacca jak likvidacyja nastupstvaŭ stychijnych biedstvaŭ, tak i «vykanańnie mierapryjemstvaŭ nadzvyčajnaha stanovišča, adnaŭleńnie kanstytucyjnaha paradku i inšyja nadzvyčajnyja situacyi».
Rasija krychu bolš za hod pravodzić vajennuju apieracyju ŭ Siryi. Rasijski kantynhient u hetaj krainie składajecca, jak śćviardžajecca, vyklučna z kantraktnikaŭ, jakim płaciać vialikija nadbaŭki za kamandziroŭku.
U vieraśni stała viadoma, što padčas vybaraŭ u Dziarždumu na vybarčyja ŭčastki ŭ Siryi pryjšli kala 4,5 tysiač rasijan. Ekśpierty ličać, što bolšaść ź ich — vajskoŭcy.
Ciapier čytajuć
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić4040
Kamientary