Mužčynskaja śmiarotnaść u Biełarusi ŭ 4,5 razy vyšejšaja, čym u ES

Śmiarotnaść mužčyn Biełarusi va ŭzroście 15—60 hadoŭ u 3—4,5 razu vyšejšaja, čym u krainach Jeŭrapiejskaha sajuza, paviedamiła kansultant adździeła śpiecyjalizavanaj dapamohi hałoŭnaha ŭpraŭleńnia arhanizacyi miedycynskaj dapamohi Ministerstva achovy zdaroŭja Žanna Jeramiejeva, vystupajučy 20 vieraśnia na sieminary dla žurnalistaŭ pa demahrafičnaj prablematycy, arhanizavanym Fondam AAN u halinie narodanasielnictva (JUNFPA) u Biełarusi.

Pavodle jaje słoŭ, nieinfiekcyjnyja zachvorvańni ź`iaŭlajucca asnoŭnaj pryčynaj zvyšśmiarotnaść mužčyn pracazdolnaha ŭzrostu.

Śmiarotnaść biełaruskich mužčyn u pracazdolnym uzroście vyšejšaja ad chvarob sistemy krovazvarotu amal u 6 razoŭ u paraŭnańni z žančynami, u tym liku pa pryčynie infarktu mijakarda — bolš čym u 20 razoŭ, ad raku — bolš čym u dva razy, ad źniešnich pryčyn — u 5,9 razu.

Namieśnik načalnika adździeła narodanasielnictva, hiendarnaj i siamiejnaj palityki Minpracy Maryna Arciomienka źviarnuła ŭvahu na vysokuju śmiarotnaść nasielnictva ŭ pracazdolnym uzroście ad pryčyn, jakija možna praduchilić: «Doŭhi čas siarod źniešnich pryčyn śmierci lidziravała vypadkovaje atručvańnie ałkaholem. U 2015 hodzie kolkaść pamierłych ad vypadkovaha atručvańnia ałkaholem była mienšaj, čym ad samahubstvaŭ. Kala 5% usich śmierciaŭ u pracazdolnym uzroście abumoŭlena mienavita ałkaholnym atručvańniem».

Jak vynik čakanaja praciahłaść žyćcia biełaruskich mužčyn u 2015 hodzie skłała 68,6 hoda suprać 78,9 u žančyn. U 2002 hodzie jana była 62,3 i 74,1 hoda adpaviedna, u 2006-m — 63,6 i 75,5 hoda.

«Hiendarny razryŭ u čakanaj praciahłaści žyćcia składaje bolš za dziesiać hadoŭ, i heta prablema», — skazała Arciomienka. U raźvitych krainach roźnica ŭ praciahłaści žyćcia mužčyn i žančyn składaje piać hadoŭ.

Śpiecyjalist adznačyła, što ŭ prahramie «Zdaroŭje naroda i demahrafičnaja biaśpieka Respubliki Biełaruś na 2016—2020 hady», pryniataj u sakaviku 2016 hoda, akcent robicca na zdaroŭi nasielnictva, aščadžalnych pavodzinach, prychilnaści da zdarovaha ładu žyćcia, mužčyn u tym liku. Naprykład, płanujecca stvaryć słužbu achovy mužčynskaha zdaroŭja.

Arciomienka adznačyła, što mužčyny nie źviartajucca svoječasova da ŭrača ŭ vypadku ŭźniknieńnia zachvorvańnia, bo «spracoŭvajuć hiendarnyja stereatypy pra toje, što mužčyny nie płačuć, nie skardziacca».

• 0
• 0
• 0
• 0
• 0
• 0
• 0
• 0