Praśpiekt Niezaležnaści pierakryjuć dla zajezdu rovaraŭ z padśvietkaj
Niezvyčajny viełaprabieh adbudziecca ŭ horadzie 22 vieraśnia, 14 vieraśnia paviedamiŭ na pres-kanfierencyi ŭ Minharvykankamie staršynia Minskaha haradskoha kamiteta pryrodnych resursaŭ i achovy navakolnaha asiarodździa Siarhiej Maślak.
Raspaviadajučy pra prahramu praviadzieńnia ŭ stalicy Jeŭrapiejskaha tydnia mabilnaści z 16 pa 22 vieraśnia, jon zhadaŭ pra maštabnaje śviata, jakoje razhorniecca na vulicy Lenina ŭ apošni dzień mierapryjemstvaŭ.
— 22 vieraśnia ruch na vulicy Lenina budzie pierakryvacca ŭžo z 6:00 i, jak miarkujecca, da 24:00. Tut budzie ŭstanoŭlenaja vialikaja scena. Dla praviadzieńnia rabot pa jaje mantažy i demantažy spatrebicca šmat času, — udakładniŭ Maślak.
Asnoŭnyja kulturna-zabaŭlalnyja mierapryjemstvy na vulicy Lenina pačnucca ŭ 16:00. Na 18:00 zapłanavanaje ŭračystaje adkryćcio śviata pry ŭdziele haradskich uładaŭ.
— Budzie vielmi šmat cikavaha, — zapeŭniŭ hałoŭny ekołah horada.
U kancercie voźmuć udzieł biełaruskija hurty. Akramia taho, na śviatočnaj placoŭcy budzie arhanizavanaje ekstremalnaje tryjał-šou, u jakim płanujuć zadziejničać junych amataraŭ rovaraŭ. Staličnyja ratavalniki prezientujuć na śviacie svaju mašynu-piarekrut: kožny achvotny zmoža adčuć, jak heta — apynucca ŭ pieraviernutym transpartnym srodku. U ramkach śviata na vulicy Lenina majuć namier taksama arhanizavać placoŭki dla varkaŭtu i tancaŭ.
— A ŭviečary budzie dadzieny start niezvyčajnaha viełaprabiehu — zajezdu rovaraŭ z padśvietkaj. Jon pačniecca a 21:00. Maršrut projdzie ad vulicy Lenina da Nacyjanalnaj biblijateki, — padsumavaŭ Maślak.
Kamientary