Usialenski patryjarch admoviŭ RPC u prośbie pieranieści Usiepravasłaŭny sabor

Pradstajaciel Kanstancinopalskaj pravasłaŭnaj carkvy Varfałamiej, jaki nosić taksama tytuły Usialenskaha patryjarcha i arcybiskupa Kanstancinopala — Novaha Rymu, zajaviŭ, što Usiepravasłaŭny sabor adbudziecca biez udziełu RPC. Jon vykazaŭ nadzieju, što Maskoŭski patryjarchat i try inšyja pravasłaŭnyja cerkvy ŭ apošniuju chvilinu pierahledziać svajo rašeńnie ab niaŭdziele i prybuduć na Kryt, pieradaje ABC News sa spasyłkaj na AP.

Patryjarch adznačyŭ, što rašeńnie ab niaŭdziele laža ciažaram na hetyja cerkvy i ich kiraŭnikoŭ, bo piać miesiacaŭ tamu jany pahadzilisia pryjechać na Kryt u červieni. U studzieni na sustrečy pravasłaŭnych cerkvaŭ u Ženievie było pryniata rašeńnie pravieści Usiepravasłaŭny sabor, kab abmierkavać misiju i rolu pravasłaŭnaha chryścijanstva ŭ sučasnym śviecie, a taksama jaje adnosiny z Vatykanam.

U paniadziełak Śviaty sinod RPC padtrymaŭ prapanovu Antyachijskaj, Hruzinskaj, Sierbskaj i Bałharskaj pravasłaŭnych cerkvaŭ ab pieranosie terminaŭ praviadzieńnia sabora, bo jany paličyli jaho paradak nieaktualnym. Maskoŭski patryjarchat taksama admoviŭsia ŭdzielničać u mierapryjemstvie, kali jano adbudziecca ŭ namiečanyja terminy.

U aŭtorak kiraŭnik adździeła źniešnich carkoŭnych suviaziaŭ Maskoŭskaha patryjarchatu mitrapalit Iłaryjon u intervju hrečaskamu partału «Ramfiea» zaklikaŭ patryjarcha Varfałamieja prajavić «ułaścivyja jamu mudraść, pakoru i spakoj». Pradstaŭnik RPC taksama skazaŭ, «kali Sabor budzie praviedzieny ŭ takim farmacie, to jaho nijak nielha ličyć ni Usiepravasłaŭnym, ni Śviatym i Vialikim, a jaho rašeńni — lehitymnymi».

Aficyjny pradstaŭnik Usialenskaha patryjarcha vialebny Iaan Chrysaŭhis zajaviŭ AP, što Varfałamiej nie vałodaje paŭnamoctvami dla pieranosu terminaŭ praviadzieńnia sabora, bo nie moža ŭ adzinočku pierahledzieć rašeńnie, pryniataje lidarami ŭsich 14 cerkvaŭ. «Varfałamiej — heta nie papa, jon nie moža ŭziać i prosta vyrašyć», — skazaŭ surazmoŭca ahienctva.

Chrysaŭhis dadaŭ, što astatnija ŭdzielniki sabora ździŭlajucca, čym mahło być vyklikana rašeńnie pra niaŭdzieł. Jon adznačyŭ, što delehacyi jašče mohuć damovicca pra pieranos sabora, kali jany źbiarucca ŭ niadzielu, ale kali jany vyrašać pravieści jaho, to pryniatyja na sabory rašeńni buduć abaviazkovyja dla ŭsich cerkvaŭ. Chrysaŭhis padkreśliŭ, što dla taho, kab mieć prava hołasu, treba prysutničać na hałasavańni.

U sieradu stała viadoma, što Sierbskaja pravasłaŭnaja carkva rašeńniem sinoda pierahledzieła svaju pazicyju i voźmie ŭdzieł u sabory.

Usiepravasłaŭny sabor adkryjecca na Krycie ŭ niadzielu i praciahniecca da 27 červienia. Apošni raz takoje mierapryjemstva adbyłosia ŭ 787 hodzie. Paśla «vialikaha raskołu» pamiž katalictvam i pravasłaŭjem ŭ 1054 hodzie sabory bolš nie pravodzilisia.

Ideja ab praviadzieńni novaha sabora cerkvaŭ upieršyniu była vyłučanaja ŭ 1920-ja hady, ale realnaja padrychtoŭka da jaho praviadzieńnia pačałasia tolki ŭ 1961 hodzie.

• 0
• 0
• 0
• 0
• 0
• 0
• 0
• 0