U Viciebsku ŭšanavali Alhierda i vystupili suprać pomnika Alaksandru Nieŭskamu FOTA

U «Noč muzejaŭ» u Viciebsku adkryli ŭnikalnuju vystavu — vynik respublikanskaha art-prajektu «Kniaź Alhierd u vyjaŭlenčym mastactvie».

Pavialičyć

Pracy 47 mastakoŭ vystaŭlenyja ŭ dźviuch zalach Mastackaha muzeju. Hetaja ekspazycyja pryciahnuła ŭviečary 17 traŭnia najbolšuju kolkaść naviednikaŭ.

U asnoŭnym heta vyjavy samoha Alhierda, syna Hiedymina, kniazia Vialikaha Kniastva Litoŭskaha, adnaho z najvydatniejšych pałkavodcaŭ i kiraŭnikoŭ starabiełaruskaj dziaržavy. U 1318-m jon ažaniŭsia ź viciebskaj kniazioŭnaj Maryjaj Jarasłaŭnaj, a ŭ 1320-m paśla śmierci viciebskaha kniazia atrymaŭ jahonaje kniastva ŭ spadčynu.

Padčas jahonaha kiravańnia siaredniaviečny Viciebsk dasiahnuŭ najvyšejšaha roskvitu. Mienavita da času kniažańnia Alhierda historyki adnosiać budaŭnictva viciebskich zamkaŭ — kompleksu mahutnych muravanych umacavańniaŭ, jaki składaŭsia z Hornaha i Nižniaha zamkaŭ. Horny zamak mieŭ piać abarončych viežaŭ, kala 800 metraŭ muravanych ścien. Ściana Nižniaha zamka mieła kala 1256 metraŭ u daŭžyniu, tut było trynaccać viežaŭ.

Pra heta nahadała padčas adkryćcia ekspazycyi Volha Akunievič, zahadčyca Mastackaha muzeju. Sam muzej, darečy, mieścicca jakraz tam, dzie ŭ daŭniejšyja časy byŭ centar Viciebsku.

Pavialičyć

Art-prajekt «Kniaź Alhierd u vyjaŭlenčym mastactvie» inicyjavany Biełaruskim sajuzam mastakoŭ. Pavodle kiraŭnicy abłasnoj arhanizacyi BSM Śviatłany Barankoŭskaj, vystava respublikanskaha maštabu adkryłasia ŭ Viciebsku nievypadkova: mienavita viciablanam naležyć honar i abaviazak zachoŭvać histaryčnuju spadčynu, źviazanuju ź imiem kniazia Alhierda. Adzin z abjektaŭ hetaj spadčyny — pomnik vialikamu kniaziu, adkryty 27 červienia 2014 hodu.

Tema pomnikaŭ histaryčnym dziejačam balučaja dla Viciebsku. Ź inicyjatyvy haradzkich uładaŭ źbirajucca ŭšanavać i naŭharodzkaha kniazia Alaksandra Nieŭskaha. Pra heta nahadaŭ prysutnym mastak Michaś Laŭkovič, adzin z udzielnikaŭ vystavy.

«My majem usie padstavy hanarycca viciebskim kniaziem Alhierdam i tym, što pamiać pra jaho ŭšanavanaja ŭ našym horadzie. Ale jakoje dačynieńnie da Viciebsku maje Alaksandar Nieŭski? Ja siońnia «huhliŭ», jak kaža naša moładź, znoŭ šukajučy choć niejkija ŭciamnyja dokazy datyčnaści hetaha rasiejskaha pałkavodca da Viciebsku. I znoŭ natrapiŭ na zaklučeńnie navukoŭcaŭ z Akademii navuk: niama histaryčnych dokazaŭ hetaj suviazi. Dyk navošta stavić pomnik u honar taho, čaho nie było? Navošta Viciebsku pomnik čužomu histaryčnamu dziejaču?» — skazaŭ spadar Laŭkovič.

Zrešty, viciebskamu siaredniaviečču ŭ Mastackim muzei byli pryśviečany šmat jakija imprezy. Pa ich naviednikaŭ supravadžała Haspadynia Zamkavaj hary — aktrysa Kołasaŭskaha teatru Raisa Hrybovič.

Pavialičyć

Hledačy ŭbačyli performans «Znaki Zamkavaj hary», pradstaŭleny Antaninaj Falej, defile histaryčnych strojaŭ «Šlachta» i vystupy ŭdzielnikaŭ klubu histaryčnaj rekanstrukcyi «Chalvil» (Viciebsk) i teatru histaryčnaha stroju «Połacki źviaz» (Połacak) — jany vystupali jakraz u časie adkryćcia vystavy, pryśviečanaj kniaziu. Mastačka Śviatłana Barankoŭskaja, aŭtarka habelena «Alhierd i Julijanija», pakazała majstar-klas pa mastackim tkactvie.

Pavialičyć

Što niezvyčajna — raspaviadajučy pry hetym «viciebskija kazki»: historyi, jakija jana sama składaje na padstavie histaryčnych materyjałaŭ. A junyja mastaki sa studyi «Ciubiki» malavali taksama amal što kazačnych persanažaŭ — žycharoŭ siaredniaviečnaha Viciebsku časoŭ kniazia Alhierda.

• 0
• 0
• 0
• 0
• 0
• 0
• 0
• 0