Biełstat: Litaratura na biełaruskaj movie zajmaje 11,4% ad vydavieckaj pradukcyi i 17,1% u jaje sukupnym tyražy
Litaratura na biełaruskaj movie zajmaje 11,4% u ahulnaj kolkaści vydavieckaj pradukcyi i 17,1% u jaje sukupnym tyražy. Takija źviestki apublikavaŭ Nacyjanalny statystyčny kamitet u ahladzie, pryśviečanym Dniu druku, jaki adznačajecca 5 maja.
Pavodle danych statystyki, na biełaruskaj movie ŭ 2015 hodzie vypuščana 1.168 knih i brašur tyražom 3,7 młn. asobnikaŭ, što ŭ paraŭnańni z papiarednim hodam bolš jak pa nazvach (na 5,7%), tak i pa tyražy (na 1,8 %).
Na ruskaj movie letaś vydadziena 8.227 knih i brašur ahulnym nakładam 16 młn. ekzemplaraŭ, što składaje 80% ahulnaj kolkaści vydańniaŭ i 74% ahulnaha nakładu.
U 2015 hodzie na anhlijskaj movie vypuščana 593 knihi i brašury, na niamieckaj — 106, na francuzskaj — 43. U liku drukavanych vydańniaŭ knihi na polskaj, kitajskaj, ispanskaj, ukrainskaj, starasłavianskaj, litoŭskaj, italjanskaj movach. U adzinkavym varyjancie vydadzienyja knihi na azierbajdžanskaj, vjetnamskaj, partuhalskaj, słavackaj, šviedskaj movach.
Usiaho ŭ 2015 hodzie vypuščana 10.273 knihi i brašury. Ahulny nakład vydańniaŭ skłaŭ 21,6 młn. asobnikaŭ. Vypusk knih i brašur u raźliku na adnaho žychara skłaŭ 2,3 asobnika.
Jak i ŭ papiarednija hady, u sukupnym abjomie vypuščanych knih i brašur pieravažaje navučalnaja litaratura, na dolu jakoj prypadaje 28% ahulnaj kolkaści vydańniaŭ i amal 60% nakładu. Piatuju častku vypusku składajuć vučebna-mietadyčnyja dapamožniki i navučalnyja prahramy. Navukovyja i navukova-papularnyja vydańni zajmajuć amal 19%.
Siarod rehijonaŭ lidarami pa vypusku knih i brašur u 2015 hodzie stali Minsk (7,3 tys. vydańniaŭ) i Homielskaja vobłaść (1,2 tys.).
U 2015 hodzie ŭ krainie vychodziła 906 časopisaŭ i 585 haziet hadavym tyražom amal paŭmiljarda asobnikaŭ. Dla čytačoŭ pracavali redakcyi 176 respublikanskich, 51 abłasnoj, 133 haradskich i 119 rajonnych haziet.
Letaś na biełaruskaj movie vydavałasia 135 časopisaŭ i 185 haziet, ich hadavy tyraž skłaŭ piatuju častku ahulnaha tyražu drukavanych ŚMI.
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie5555
Kamientary