Prafiesijny sport u śviecie daŭno staŭ palitykaj i častkaj farmakałohii. Takoje mierkavańnie vykazaŭ Alaksandr Łukašenka, adkazvajučy na pytańni žurnalistaŭ.
«Ciapier ja ź vialikaj naściarožanaściu, ale nadziejaj čakaju Alimpijskich hulniaŭ [projduć u žniŭni 2016 h. u Rya-de-Žaniejra]. Ale budzie vielmi ciažka. Sport staŭ palitykaj. Ciapier ciažka zmahacca ź viadučymi krainami śvietu. Bo čystaha sportu vielmi mała», — zajaviŭ kiraŭnik dziaržavy.
Pavodle słoŭ Alaksandra Łukašenki, antydopinhavyja arhanizacyi jašče, mahčyma, navat nie znajšli sposaby vyjaŭleńnia tych najnoŭšych preparataŭ, jakija pa siłach raspracavać u bujnych dziaržavach. «Mnie zdajecca, što ŭžo niekatoryja krainy raspracavali takija dopinhi u sporcie (pryrodnyja, nie abaviazkova sintetyka), jakich nichto jašče nie viedaje», - skazaŭ kiraŭnik dziaržavy.
Jon padkreśliŭ, što zaŭsiody adkryta vystupaje za čyściniu ŭ sporcie. «Ja kateharyčna za toje, kab sport byŭ čystym. Bo ŭ takim sporcie nam lahčej budzie pieramahčy. A spaborničać z tymi, chto navučyŭsia abychodzić dopinhavyja rečy, nam vielmi składana. Zaraz sport — heta ŭžo nie toj čysty sport, jakoha nam chaciełasia b. Jon užo daŭno staŭ i palitykaj, i niejkaj častkaj miedycyny, farmakałohii», — zajaviŭ biełaruski lidar.
Što tyčycca hatoŭnaści biełaruskich atletaŭ da letniaj Alimpijady ŭ Brazilii, Łukašenka nie staŭ davać kankretnych acenak i rabić prahnozy. «Bližej da Alimpijady my na heta pahladzim i praviadziem adpaviednaje mierapryjemstva. Jak Prezident NAK, ja abaviazany budu pravieści hety ahlad», - skazaŭ jon.
Kamientary