Biełaruskija startapy, jakija mohuć chutka paŭtaryć pośpiech MSQRD

«Niadaŭniaja historyja pośpiechu MSQRD i jaho dałučeńnie da Facebook mnohim prademanstravali prykład, u jakim kirunku treba ruchacca, — raspaviadaje suzasnavalnica minskaha biznes-kłuba Imaguru Nastaśsia Chamiankova. — Pieršy pratatyp MSQRD jaho stvaralniki prademanstravali na listapadaŭskim chakatonie ŭ Imaguru i pieramahli ŭ im. Ale na hetym jany nie spynilisia i praciahvali aktyŭna raźvivać i prasoŭvać svoj prajekt. Heta vielmi važna, bo časam mnohija ahučvajuć fajnuju ideju, ale na hetym usio i zakančvajecca. Pa našaj statystycy, z 15 kamand, sfarmavanych na chakatonie, 4 potym paśpiachova pracujuć».

Nastaśsia Chamiankova padkreślivaje, što vypadak sa startapam MSQRD — nie adziny ŭ Biełarusi. U nas jość šmat paśpiachova realizavanych prajektaŭ. Ale z-za svajoj vuzkaj nakiravanaści jany nie takija viadomyja, jak MSQRD. Tym nie mienš Nastaśsia pieraličvaje biełaruskija startapy, što nieŭzabavie mohuć strelić.

Alta-ai.com — asabisty finansavy pamočnik, jakomu vy možacie naŭprost zadavać pytańni i adrazu atrymlivać karysnyja parady ŭ finansavaj śfiery. Kštałtu, jaki kredyt lepš uziać i dzie, jaki bankaŭski ŭkład vam najbolš padychodzić.

Ontourcloud — hłabalnaja sistema pošuku, stvoranaja śpiecyjalna dla arhanizataraŭ kancertaŭ i muzykaŭ. Dziakujučy joj, vy možacie sačyć za pieramiaščeńniem artystaŭ dy muzykaŭ i prapanoŭvać im vystupić na svaich placoŭkach. Muzyki ŭ svaju čarhu mohuć raśpisać sabie tur — prahrama padbiare najbolš vyhadny maršrut i placoŭki, dzie možna vystupić.

Kuku.io — veb-dadatak, jaki dapamahaje praściej płanavać i raźmiaščać pasty, kali ŭ vas jość niekalki akauntaŭ u roznych socsietkach. Aproč hetaha, vy možacie praanalizavać ich papularnaść praz analityku i roznyja padkazki.

Vouff — servis, čymści padobny na MSQRD. Jon vyznačaje, jakija tavary albo brendy vykarystoŭvajucca ŭ videa, i dazvalaje zamianiać ich u onłajn-režymie. Naprykład, na videa vy špacyrujecie pa vulicy z kołaj, a Vouff zamianiaje jaje na piva.

Nastaśsia Chamiankova pierakananaja, što kožny žadajučy moža arhanizavać svoj startap:

Pavialičyć

«Da nas zvyčajna prychodziać startapiery, jakija dahetul užo pracavali ŭ roznych IT-kampanijach. Ale jość ludzi i z samych roznych śfier, jakija chočuć sa svajho chobi ci zachapleńnia zrabić prajekt i źmianić suśviet. I heta, darečy, vielmi razumna. Kali ŭ vas uźnikła aryhinalnaja ideja, zrabicie jaje makiet na papiery i paznajomcie ź joj patencyjnuju aŭdytoryju vašaha praduktu. Tady ŭ vas składziecca bolš daskanałaje ŭjaŭleńnie, jakim vaš prajekt musić być i čaho jamu nie chapaje. Nastupny krok — stvareńnie kamandy dla realizacyi idei. Dziela hetaha lepš naviedać luby chakaton — spabornictvy, na jakich na praciahu 48 hadzin bieź pierapynku stvarajucca startapy i padbirajucca ŭdzielniki kamand».

Pa słovach Nastaśsi Chamiankovaj, u śfiery vysokich technałohij aktyŭna zajaŭlajuć pra siabie i žančyny.

«Asabliva šmat dziaŭčat u śfiery mabilnych dadatkaŭ. Ich cikaviać takija trendavyja siońnia temy, jak zdarovy ład žyćcia: sport, fitnes, pryhažość».

Adzin z samych jaskravych prykładaŭ — kampanija RedRockApps, zasnavanaja Luboŭju Paškoŭskaj, Natallaj Bachar i Iharam Judzinym. Śfiera ich dziejnaści — stvareńnie mabilnych dadatkaŭ dla zaniatkaŭ sportam i fitnesam. Jašče adzin cikavy startap, zasnavany biełaruskaj — MeetnGreetme. Nad jaho stvareńniem pracavali Alena Škaruba, Andrej Hajdukievič i Mikałaj Vychoŭski.

Pavialičyć

«Heta taki Uber dla padarožnikaŭ, — žartuje Naścia. — Ciapier usio bolš ludziej addajuć pieravahu samastojnym padarožžam. Z dapamohaj hetaha resursu vy ź lohkaściu zmožacie znajści čałavieka ŭ luboj krainie śvietu, jaki za peŭnuju płatu ci pa indyvidualnaj damoŭlenaści papracuje vašym asabistym kanśjeržam. Naprykład, dapamoža vam patrapić na zakrytuju viečarynu ci parekamienduje cikavyja miescy, jakija varta naviedać i pra jakija viedajuć tolki miascovyja».

Treba adznačyć, što ŭ minułym hodzie startap skaryŭ žury konkursu GES Women Entrepreneurship Day. A sama Alena Škaruba stała ŭdzielnicaj inicyjatyvy Biełaha doma SPARK pa spryjańni raźvićciu žanočaha i junackaha pradprymalnictva.

• 0
• 0
• 0
• 0
• 0
• 0
• 0
• 0