Salista ŭkrainskaha hurtu «Fiolet» nie puścili ŭ Biełaruś, bo jon u rasijskich čornych śpisach
18 sakavika Siarhiej Martyniuk kiravaŭsia z Łucku ŭ Bieraście, dzie mieŭsia dać kancert u miežach turu svajho solnaha prajektu «Pianoakustika», ale biełaruskija pamiežniki admovili ŭkrainskamu muzykantu va ŭjeździe ŭ krainu.
«Supracoŭniki biełaruskaj mytni patłumačyli, što zabarona na ŭjezd dziejničaje ŭ suviazi z adpaviednym rašeńniem Rasiejskaj Fiederacyi, jakaja pašyrajecca i na terytoryi Biełarusi», – napisaŭ Siarhiej u aficyjnaj supołcy hurtu. Zaplanavanyja kancerty ŭ Bieraście, Miensku dy Viciebsku daviałosia admianić.
«Siarhieja prosta ssadzili z rejsavaha aŭtobusu na miažy i skazali, što zabarona na jahony ŭjezd raspaŭsiudžvajecca na ŭsie krainy Mytnaha sajuzu, – raspavioŭ Tuzin.fm arhanizatar kancertu Siarhieja Martyniuka ŭ Bieraści Źmicier Nazaraŭ. – Ja adrazu ž patelefanavaŭ u Pamiežny kamitet, ale tam mnie adno tolki paraili šukać inicyjatara zabarony. Źviarnuŭsia ŭ adździeł pa mihracyi, tam skazali, što infarmacyjaj, datyčnaj hetaj asoby, nie vałodajuć. Vidavočna, što ŭ biełarusaŭ pretenzij da jaho niama, jon prachodzić pa śpisach ad Rasiei. Ciapier budziem rabić zapyty va ŭkrainskaje konsulstva, kab damahčymsia skasavańnia zabarony, bo tut cierpiać biełaruska-ukrainskija suviazi». Usie kvitki na siońniašni kancert ukrainskaha muzyka ŭ Bieraście byli pradadzienyja. Arhanizatary vystupu paciarpieli finansavyja straty, ciapier jany buduć vymušany viartać hrošy za kvitki.
Siarhiej Martyniuk – zasnavalnik hurtu «Fiolet» z Łucku, a taksama muzyčnaha prajektu «TraTaTa», jon taksama źjaŭlajecca adnym z arhanizataraŭ festyvalu «Banderštat». Jon aktyŭna prasoŭvaje sučasnuju biełaruskuju muzyku va Ŭkrainie, zapisaŭ duet z Palinaj Respublikaj i ŭklučyŭ u svoj repiertuar biełaruskamoŭnuju pieśniu na słovy Jana Maŭzera «Miejsca pakuty», jakaja ŭ sezonie 2010-2011 uvajšła ŭ top-12 hałoŭnych biełaruskich hitoŭ sezonu na Tuzin.fm. Tym nia mienš, nieadnojčy jaho kancerty ŭ Biełarusi zryvalisia z roznych pryčynaŭ.
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary