Łukašenka: Handboł u Biełarusi pakul znachodzicca ŭ pahraničnym stanie

Handboł u Biełarusi pakul znachodzicca ŭ «pahraničnym stanie», zajaviŭ Alaksandr Łukašenka 18 lutaha na cyrymonii adkryćcia staličnaha Pałaca sportu «Uručča» i mižnarodnaha dziciačaha turniru pa handbole, paviedamlaje pres-słužba prezidenta.

Pavodle jaho słoŭ, hety vid sportu «pryŭźniali na niejki ŭzrovień, ale dalej nieabchodny šturšok» dla jaho raźvićcia. Łukašenka nie sumniavajecca, što biełaruskija handbalisty zdolejuć dasiahnuć vysokich vynikaŭ.

Novy pałac sportu, adznačyŭ jon, źjaŭlajecca ŭnikalnym pa svaim profili abjektam, anałahičnych jakomu ŭ krainie jašče nie było: «U załach stvoranyja ŭsie nieabchodnyja ŭmovy dla praviadzieńnia mižnarodnych spabornictvaŭ i padrychtoŭki spartsmienaŭ samaha vysokaha ŭzroŭniu. Tut buduć treniravacca hulcy pa takich vidach sportu, jak handboł, valejboł, baskietboł i mini-futboł, a taksama tenis i badminton. Pryčym pryjści siudy zmohuć jak vajskoŭcy, tak i žychary, hości stalicy».

«Našaj metaj źjaŭlajecca vychavańnie zdarovych, mocnych i fizična raźvitych abaroncaŭ Ajčyny, zdolnych nadziejna arhanizavać jaje biaśpieku», — dadaŭ jon.

Łukašenka adznačyŭ vialikuju rolu sportu va ŭmacavańni davieru i družby pamiž narodami, zachavańni śvietu. «Pryjemna bačyć tut našych susiedziaŭ, zamiežnych haściej. Usim zrazumieła, što krainy pavinny sapierničać vyklučna na spartyŭnych arenach, ale ni ŭ jakim razie nie na poli boju», — skazaŭ jon.

Pavodle słoŭ biełaruskaha kiraŭnika, choć Pałac sportu «Uručča» i šmatprofilny, asnoŭnaja ŭvaha tut budzie nadavacca raźvićciu handboła i jaho papularyzacyi. Jon zapeŭniŭ, što dziaržava hatovaja padtrymlivać spartsmienaŭ, u tym liku handbalistaŭ, ale «padstavić plačo tolki tam, dzie heta nieabchodna», paviedamlaje pres-słužba.

«Chopić užo kazać pra papularyzacyju. Treba vyjhravać, — zajaviŭ Łukašenka na adkryćci turniru. — My zanadta šmat srodkaŭ ukłali ŭ sport, ale, skažu ščyra, naležnaj addačy narod, biełaruskija hledačy pakul nie atrymali. Nam patrebny vynik, i treba pakazvać vyniki ŭ sporcie najvyšejšych dasiahnieńniaŭ, bo dla hetaha jość usie nieabchodnyja ŭmovy. Heta naša zadača. I pačynać varta voś z hetych chłopcaŭ, jakija ŭdzielničajuć u spabornictvach. Treba ich padtrymlivać. Voś tady ŭ nas budzie dobry rezierv. I tady buduć takija samyja mocnyja handbalisty, jak Siarhiej Rutenka, na kožnym kvadratnym mietry, a nie adzin na ŭsiu krainu. Padrastaje novaje pakaleńnie spartsmienaŭ, budziem uvažliva za imi nazirać».

• 0
• 0
• 0
• 0
• 0
• 0
• 0
• 0