Recesija ŭ Biełarusi ŭ nastupnym hodzie zachavajecca. U 2016 hodzie VUP Biełarusi źnizicca na 1%, a sioleta ekanamičny spad składzie 3,7%. Takija acenki pryvodziacca ŭ śniežańskim makraekanamičnym ahladzie, jaki padrychtavaŭ Daśledčy centr IPM.
Nahadajem, zhodna z aficyjnymi źviestkami za studzień—kastryčnik, VUP Biełarusi źniziŭsia na 3,9% u paraŭnańni z anałahičnym pieryjadam 2014 hoda. Praciah recesii ŭ biełaruskaj ekanomicy ŭ 2016 hodzie vielmi vierahodny z ulikam depresiŭnaha stanu inviestycyjnaha popytu ŭ krainie, ličać ekśpierty.
Pryhniečany inviestycyjny popyt, pavodle ich prahnozaŭ, budzie, z adnaho boku, abumoŭleny tym, što pradpryjemstvy z pryčyny nizkaha popytu na pradukcyju nie zmohuć zadziejničać navat najaŭnyja mahutnaści, sfarmiravanyja ŭ mnohich vypadkach za pieryjad madernizacyi ŭ 2012—2014 hadach. «Realny siektar čakaje dastatkova nizkuju addaču na inviestycyi, prymajučy da ŭvahi słaby patencyjał rostu, niapeŭnaść, a taksama (u šerahu vypadkaŭ) lišak nakoplenaha kapitału ŭ papiarednija pieryjady», — havorycca ŭ makraekanamičnym prahnozie.
Ź inšaha boku, nizkaja inviestycyjnaja aktyŭnaść u krainie zachavajecca ŭ 2016 hodzie z pryčyny vysokaha koštu kredytnych resursaŭ, adznačajuć ekanamisty Daśledčaha centra IPM. «Faktyčna realnyja staŭki hrašovaha rynku zastajucca na nadzvyčaj vysokim uzroŭni za košt vysokich inflacyjnych čakańniaŭ, jakija adlustroŭvajuć nizki davier da ekanamičnaj palityki, jakaja pravodzicca», — havorycca ŭ dakumiencie.
Takim čynam, uličvajučy pryhniečany stan inviestycyjnaj aktyŭnaści, ekanamičny spad u Biełarusi ŭ nastupnym hodzie zachavajecca. «Praciahłaja recesija niepaźbiežna budzie pryvodzić da źnižeńnia zaniataści i rostu biespracoŭja. Padobny scenaryj užo pačaŭ realizoŭvacca ŭ 2015 hodzie, i my razhladajem jaho ŭ jakaści najbolš vierahodnaha dla 2016 hoda», — adznačajuć ekanamisty Daśledčaha centra IPM.
Zachavańnie recesii, prahnazujuć jany, budzie paradžać imknieńnie biełaruskich uładaŭ «dać dadatkovyja stymuły dla jaje chutčejšaha pieraadoleńnia». «Adnak na siońnia abmiežavańni dla ekanamičnaj palityki bačacca nastolki žorstkimi, što my zychodzim z taho, što ŭrad nie zmoža realizavać hetaje imknieńnie», — havorycca ŭ ahladzie.
Pry hetym jaho aŭtary papiaredžvajuć, što štučnaje stymulavańnie ekanomiki moža stvaryć pahrozy dla finansavaj stabilnaści.
Kamientary