Piaciora biełaruskich apazicyjnych lidaraŭ źviarnulisia da ES z prośbaj pierazahruzić ŭnutranyja pieramovy ab demakratyčnych reformach u Biełarusi, paviedamlaje Euobserver.
Jak havorycca ŭ adkrytym liście da kiraŭnikoŭ instytutaŭ ES, błok pavinien vykarystać svoj upłyŭ na Alaksandra Łukašenku, kab pierazahruzić Kruhły stoł pamiž uładaj i apazicyjaj, zakansiervavany ŭ 1999 hodzie.
Palityki ličać, što «pieramoŭny praces», jaki pavinien uklučać pasrednikaŭ ad ABSIE i ad orhanaŭ ES, moža «pašyryć prastoru svabody» dla refarmistaŭ.
Jany taksama zaklikali ES patrabavać lepšych standartaŭ u Biełarusi padčas parłamienckich vybaraŭ u nastupnym hodzie, naprykład, šlacham pryniaćcia apazicyjanieraŭ u vybarčyja kamisii i zabieśpiačeńnia «adkrytaha i prazrystaha» padliku hałasoŭ.
List źjaviŭsia ŭ piatnicu, paśla taho, jak ES prypyniŭ na čatyry miesiacy sankcyi suprać Łukašenki i jaho atačeńnia.
Zvarot padpisali Siarhiej Kalakin, Anatol Labiedźka, Uładzimir Niaklajeŭ, Pavieł Sieviaryniec i Mikałaj Statkievič. Taćciana Karatkievič i Alaksandr Milinkievič padpisvać zvarot admovilisia. Apošni, pavodle jaho słoŭ, z-za taho, što «pakinuŭ palityku».
U 1999 hodzie pry dapamozie kansultacyjna-naziralnaj misii ABSIE pad kiravańniem Chansa Hieorha Vika była sproba naładzić dyjałoh pamiž aficyjnym Minskam i biełaruskaj apazicyjaj. Metaj pieramoŭ pavinien byŭ stać rehularny dostup apazicyjnych partyj da srodkaŭ masavaj infarmacyi, demakratyčnyja reformy parłamienta, sapraŭdy svabodnyja i spraviadlivyja vybary, spynieńnie pieraśledu palityčnych apanientaŭ na asnovie Kryminalnaha kodeksa i administracyjnaha sudavodstva. Adnak hetaja sproba paciarpieła fijaska.
U vice-śpikierki Kaardynacyjnaj rady Lizaviety Prakopčyk sabrałasia $12 tysiač daŭhoŭ106
Kamientary