Milicyja abviarhaje infarmacyju ab cisku na Ryhora Kastusiova i jaho dačku
Supracoŭnik milicyi, jaki vylikaŭ va UUS Mahiloŭskaha abłvykankama dačku eks-kandydata ŭ prezidenty Ryhora Kastusiova Kaciarynu, nie dapuściŭ parušeńnia zakanadaŭstva, śćviardžajuć u abłasnoj milicyi.
Nahadajem, učora Ryhor Kastusioŭ zajaviŭ, što supracoŭnik UUS Mahiloŭskaha abłvykankama na praciahu niekalkich dzion sprabuje vyklikać na dopyt jaho dačku Kaciarynu, pry hetym admaŭlajecca prysłać pozvu. «Jon skazaŭ, što jamu treba ź joju pahavaryć nakont numara jaje telefona, jakim Kacia nie karystajecca ŭžo piać hadoŭ i naohuł užo zabyłasia pra jaho, — raskazvaŭ apazicyjny palityk, uhledzieŭšy ŭ dziejańniach milicyi sprobu akazać nacisk na jaho praz rodnych z-za jaho palityčnaj dziejnaści.
21 vieraśnia supracoŭnik UUS Mahiloŭskaha abłvykankama sapraŭdy prapanavaŭ Kaciarynie Kastusiovaj źjavicca va UUS dla apytańnia pavodle materyjału pravierki, jaki znachodzicca ŭ vytvorčaści, paviedamili BiełaPAN u abłasnym pravaaachoŭnym viedamstvie.
«U telefonnaj razmovie Kastusiova K.R. rastłumačyła, što jana hatovaja prybyć va UUS da 10.00 22 vieraśnia. Joj taksama było rastłumačana, što pozva, jakaja paćviardžała znachodžańnie va UUS, budzie ŭručana joj paśla praviadzieńnia apytańnia. 22 vieraśnia hramadzianka Kastusiova K.R. znachodziłasia va UUS z 10.00 da 10.35, dzie praviedziena jaje apytańnie vyklučna pa materyjale pravierki», — śćviardžajuć u abłasnoj milicyi.
Tam taksama zaznačajuć, što z boku supracoŭnika UUS nie dapuščana parušeńniaŭ dziejnaha zakanadaŭstva, tamu što vyklik dla apytańnia moh być ažyćcioŭleny jak šlacham uručeńnia pozvy, tak i z vykarystańniem inšych srodkaŭ suviazi (pa mabilnym telefonie).
«Paśla infarmacyi ŭ presie jany razmaŭlać stali zusim pa-inšamu, jak sapraŭdy pavinny. Prysłali mašynu za joj, pryvieźli pozvu, advieźli va UUS, tam pahutaryli, jana padpisała tłumačeńni pa spravie i jaje potym na mašynie zavieźli na pracu», — raskazaŭ BiełaPAN Ryhor Kastusioŭ.
Jon zaznačaje, što jamu ŭsio-taki zastajecca niezrazumiełym, navošta ŭ milicyju vyklikali jaho dačku. «Ja dahetul nie mahu zrazumieć, navošta jaje ciahali. Jaje pakazańni pa spravie, ja dumaju, nijakaj roli dla ich nie adyhrali, i ŭsio jon by moh spytacca pa telefonie. Kali b jon nazvaŭsia pa-narmalnamu, a nie adnym imieniem, i rastłumačyŭ by sutnaść spravy», — skazaŭ apazicyjny palityk.
Kamientary