Biełaruski sport robić istotny ŭniosak u prasoŭvańnie nacyjanalnych intaresaŭ u źniešniaj palitycy, zajaviŭ Alaksandr Łukašenka padčas naviedvańnia 22 vieraśnia Nacyjanalnaha alimpijskaha kamiteta.
«Siońnia kažuć: sport pa-za palitykaj. Sport — heta samaja vialikaja palityka», — cytuje Łukašenku dziaržaŭnaje ahienctva BiełTA. Pośpiechi ŭ spartyŭnaj śfiery sadziejničajuć paznavalnaści Biełarusi, pašyreńniu mižnarodnaha supracoŭnictva, rastłumačyŭ jon.
Łukašenka zaklikaŭ «vialikich spartsmienaŭ» adekvatna ŭsprymać krytyku z boku hramadstva. «Na luboha spartsmiena zaŭsiody akazvaŭsia nacisk. Vy — vialikija, vy vystupajecie siarod roŭnych. Kali vy, dasiahnuŭšy takoj vyšyni, traplajecie pad krytyku ŭ srodkach masavaj infarmacyi, nu što ž, ciarpicie i pieraadolvajcie hety nacisk. Na vas cisnuć nie tamu, što vy drennyja, a tamu, što vašy pieramohi — heta bolš, čym palityka», — skazaŭ jon.
Pavodle słoŭ Łukašenki, va ŭsiaho śvietu Biełaruś asacyjujecca ź imiem Darji Domračavaj. Spartsmieny takoha ŭzroŭniu, zajaviŭ jon, mocna «ŭmanciravanyja ŭ palityku», «z hetaha pačynajecca ŭvieś dyjałoh na samym vysokim uzroŭni».
U Biełarusi, zaznačyŭ kiraŭnik dziaržavy, nikoli nie škadavali hrošaj na raźvićcio sportu, tamu i zapytańnie sa spartsmienaŭ adpaviednaje. «Treba pryvyknuć da krytyki. Kali nie budzie krytyki, alternatyvy, hetaha cisku, to nie budzie vyniku», — miarkuje Łukašenka.
Jon padkreśliŭ, što pieramohi spartsmienaŭ — heta pradmiet asablivaha honaru biełaruskaha naroda. «Pra biełarusaŭ zaraz havorać jak pra maładuju, spartyŭnuju nacyju, jakaja dynamična raźvivajecca. Hetaje pytańnie nie tolki imidžu dziaržavy, ale i jaje budučyni», — skazaŭ Łukašenka.
Kamientary