Sioleta dla vakcynacyi suprać hrypu ŭ Biełarusi budzie vykarystoŭvacca rasijskaja vakcyna «Hrypoł plus».
Pra heta paviedamiła na pres-kanfierencyi 22 vieraśnia ŭ Minsku namieśnik načalnika adździeła hihijeny i prafiłaktyki Ministerstva achovy zdaroŭja Ina Karaban.
«Hetaja vakcyna i pa tendary vyjhrała, i jaje zakuplajuć mnohija pradpryjemstvy dla praviadzieńnia vakcynacyi svaich supracoŭnikaŭ», — zaznačyła jana.
Pavodle słoŭ Karaban, «Hrypoł plus» vykarystoŭvajecca ŭ Biełarusi na praciahu apošnich piaci hadoŭ, adnak jaje vysokaja cana nie dazvalała joj vyjhravać tendar na masavuju zakupku vakcyn. «Sioleta była prapanavanaja cana nižejšaja, čym u kampanii, jakaja pastaŭlała kitajskuju vakcynu («Fluvaksin»), jakuju my vykarystoŭvali z 2010 hoda», — dadała śpiecyjalist.
Jana padkreśliła, što «Hrypoł plus» adnosicca da subadzinkavych vakcyn, jakija ŭtrymlivajuć tolki pavierchnievyja białki, i «pa minimumie vyklikaje pabočnyja reakcyi». Supraćpakazańniami dla prymianieńnia źjaŭlajucca alerhičnyja reakcyi na papiaredniaje vakcynavańnie suprać hrypu, a taksama alerhija na kuryny białok, adterminavanym supraćpakazańniem — vostryja fazy zachvorvańniaŭ.
Vakcynacyja suprać hrypu pravodzicca ŭ Biełarusi ŭ kastryčniku—listapadzie.
Akramia «Hrypoła plus» sioleta buduć dastupnyja vakcyny «Vaksihryp» (Francyja), «Influvak» (Niderłandy), «Ultravak» (Rasija), «Fluvaksin» (Kitaj). Košt vakcynacyi dla nasielnictva pakul nieviadomy, ale, pavodle słoŭ Karaban, jon budzie nie našmat vyšejšy za letašni i składzie aryjencirovačna ad 90 da 150 tysiač.
Jak zaznačyła kiraŭnik Nacyjanalnaha centra pa hrypie Respublikanskaha navukova-praktyčnaha centra epidemijałohii i mikrabijałohii Natalla Hrybkova, «Hrypoł plus» taksama ŭtrymlivaje ŭ składzie imunamadulatar poliaksidonij. «Pavodle źviestak rasijskich aŭtaraŭ, najaŭnaść poliaksidoniju ŭ hetaj vakcynie dazvalaje ŭźniać supraciŭlalnaść arhanizmu da inšych reśpiratornych infiekcyj, jakija mohuć nas praśledavać na praciahu ŭsiaho epidemičnaha siezonu», — skazała jana.
Akramia taho, dadała Hrybkova, usie partyi vakcyn, jakija pastupajuć u Biełaruś, praviarajucca na biasškodnaść i reaktahiennaść. «Pierš čym pastupić da spažyŭca, jany buduć pravieranyja, niahledziačy na dobryja prodažnyja charaktarystyki. Nadalej płanujecca taksama pravierka śpiecyfičnaj aktyŭnaści, ale, pavodle źviestak rasijskich daśledčykaŭ, jaje supraćvirusnaja aktyŭnaść davoli vysokaja», — zaznačyła śpiecyjalist.
Kamientary