Na naradzie pa pytańniach vytvorčaści i abarotu ałkaholnaj pradukcyi 20 žniŭnia kiraŭnik dziaržavy zapatrabavaŭ ad urada navieści žorstki paradak u hetaj śfiery.
«Naviadzieńnie žorstkaha paradku ŭ śfiery vytvorčaści i abarotu ałkaholnaj pradukcyi — pramy abaviazak dziaržavy. My nie pavinny dapuścić, kab biełaruski narod niščyli niajakasnymi padrobkami i nizkaprobnym kantrafaktam».
«Aktyŭnaja palityka, jakuju prapanoŭvaŭ urad i siońnia prapanoŭvaje, praktyčna źniščyła, jak kažuć śpiecyjalisty, halinu. Akcyzy pryviali da pavieličeńnia cany i razam z kantrafaktam — da źnižeńnia popytu na hetuju pradukcyju, a značyć — straty biudžetu, — adznačyŭ Łukašenka. — Pryvatnyja struktury za košt razvarotlivaści i za košt nie viedaju jakich faktaraŭ (heta vy mnie skažacie, až da chabaru i ŭzakońvańnia niejkaha chabaru i nadzialeńnia jaho statusam premij, bonusaŭ i inšaha) zaniali pryblizna 35% rynku, pry hetym niadobrasumlenna adciskajučy dziaržaŭnyja struktury, u tym liku z dapamohaj sietkavych struktur».
«Dyktat sietak niedapuščalny, jon užo nabliziŭsia da nieprymalnaha značeńnia», — padkreśliŭ kiraŭnik dziaržavy.
Jon taksama źviarnuŭ uvahu na prablemu niesvoječasovych raźlikaŭ za likiora-harełačnyja vyraby. «Jak ja ŭžo skazaŭ, vyciskajucca dziaržpradpryjemstvy. Ź dziaržpradpryjemstvaŭ za realizacyju likiora-harełačnych vyrabaŭ patrabujuć skidki, časam da 40% koštu, i, jak ja kazaŭ, ustanaŭlivajuć niezrazumiełyja bonusy i premii dla handlovych sietak za košt, naturalna, vytvorcy», — skazaŭ Łukašenka.
Pavodle jaho słoŭ, kantrafaktnaja pradukcyja z Rasii i inšych dziaržaŭ «zadušyła krainu». «Chto pieraškadžaje ŭradu abaranić ułasny rynak?» — pacikaviŭsia Łukašenka.
Jon taksama paviedamiŭ, što śpiecyjalisty prapanoŭvajuć uvieści žorstkuju adkaznaść za pastaŭki ŭ Biełaruś kantrafaktnaj pradukcyi, až da kanfiskacyi transpartnych srodkaŭ, na jakich jana pastaŭlajecca.
«Była pastaŭlenaja zadača — nie dapuskać na ŭnutrany rynak pastupleńnia niajakasnaj pradukcyi, skaracić cieniavy abarot ałkaholnych napojaŭ. Heta nie tolki strata biudžetu, ale ŭ pieršuju čarhu pahroza zdaroŭju i žyćciu ludziej», — zajaviŭ Łukašenka.
Jon padkreśliŭ, što ałkaholnaja pradukcyja — heta asablivy padakcyzny tavar, abarot jakoha va ŭsim śviecie žorstka rehulujecca dziaržavaj. «Nie vyklučeńnie i naša kraina. My pastajanna trymajem na kantroli hetuju temu. Uviali manapoliju dziaržavy pa ŭsich hetych pytańniach. Tak heta ci nie tak — heta pieršaje pytańnie, na jakoje treba adkazać dakładčykam», — skazaŭ kiraŭnik dziaržavy.
Łukašenka nahadaŭ, što 1 lipienia hetaha hoda jon pryniaŭ ukaz i dekret ab uviadzieńni dadatkovych mier pa ŭzmacnieńni dziaržrehulavańnia ŭ śfiery vytvorčaści i abarotu ałkaholnaj pradukcyi.
Adnak u hetaj halinie ŭsio jašče zachoŭvajucca niehatyŭnyja tendencyi: na fonie skaračeńnia ajčynnaj vytvorčaści raście impart śpirtnoha i jaho nielehalny abarot.
«Na žal, urad pavodzić siabie vielmi nierašuča ŭ pryniaćci mier pa abaronie ŭnutranaha rynku. Heta nikudy nie varta», — aburyŭsia Łukašenka. Jon zapatrabavaŭ ad ministra handlu Valancina Čakanava prainfarmavać ab situacyi ŭ halinie, padkreśliŭšy, što mienavita jamu dadzienaja ŭsia paŭnata ŭłady pa vyrašeńni hetych pytańniaŭ.
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary