Rejtynh padtrymki prezidenta Brazilii skaciŭsia da 8%

Dyłma Rusief stała samym niepapularnym lidaram Brazilii z 1985 hoda, kali ŭ krainie skončyłasia vajennaja dyktatura, piša Digital Journal.

Jak pakazała apytańnie, 71% adnaznačna nie ŭchvalaje dziejańni Rusief na pasadzie prezidenta (jašče miesiac tamu było 65%). Padtrymlivajuć jaje dziejańni tolki 8% (minus dva adsotki za miesiac). Roŭna dźvie traciny chočuć impičmientu.

Adkazy amal nie zaležać ad uzroŭniu adukacyi ci prybytku apytanych.

Jak piša vydańnie, Rusief nie lubiać za razhuł karupcyi (i ŭ pryvatnaści karupcyjny skandał ź dziaržaŭnaj naftavaj kampanijaj «Petrobras»), stahnacyju ekanomiki, vysokuju inflacyju (za 2014 hod ceny vyraśli na cełych 6,87%, na prykładna takim uzroŭni inflacyja trymajecca ŭžo dziasiatak hod) i rost biespracoŭja. Nie lubiać jaje i za cisk u budaŭnictvie hidraelektrastancyj u basiejnie Amazonki (bolšaść suprać).

Asabliva niavyhadna jana hladzicca na fonie nadzvyčaj papularnaha papiarednika, byłoha prezidenta Łuisa Inasiu de Silva (u narodzie prosta «Łuła»). Navat Fiernandu Kołar dy Miełu, jaki ŭ 1992 hodzie praź impičmient byŭ skinuty z pasady prezidenta za karupcyjny skandał, mieŭ rejtynh niepadtrymki ŭ 68%.

Što cikava, Rusief znachodzicca na druhim prezidenckim terminie. Upieršyniu jana była abranaja ŭ 2010 hodzie, u pieršym tury mieła 46,9% hałasoŭ, u druhim — 56%. Na nastupnych vybarach u 2014 hodzie ŭ pieršym tury jana nabrała 41,6%, u druhim pieramahła ź minimalnym adryvam i 51,6% hałasoŭ.

***

Dyłma Rusief — pieršaja žančyna-prezident u historyi Brazilii. U kancy 1960-ch była siabram uzbrojenaha padpolla u Sacyjałstyčnaj partyi Brazilii i jaje radykalnym «bajavym» kryle «Kamanda nacyjanalnaha vyzvaleńnia». Asabista nie brała ŭdzieł u bajach. Z 1970 pa 1972 hod była ŭ turmie, pieražyła katavańni. Praz peŭny čas pa vyzvaleńni pačała lehalnuju palityčnuju dziejnaść, brała ŭdzieł u papulisckaj Demakratyčnaj rabočaj partyi. Z kanca 1990-ch siabra levacentrysckaj Partyi pracoŭnych (jakuju zasnavaŭ jaje papiarednik na pasadzie prezidenta — Łuła). Na siońnia joj 67 hod. Dvojčy była zamužam, raźviedzienaja, maje dačku i ŭnuka. U 2009 hodzie źlekavałasia ad raku limfavuzłoŭ, praz chimijaterapiju peŭny čas chadziła ŭ paryku.

Jašče ŭ 2014-m nazyvałasia Forbes čaćviortaj u śpisie samych upłyvovych žančyn płaniety (pierad joj byli Anhieła Mierkiel, Džanet Jelen i Mielinda Hiejts). U rejtynhu 2015 hoda ŭžo tolki siomaja.

• 0
• 0
• 0
• 0
• 0
• 0
• 0
• 0