Hienietyki: amierykanskija indziejcy pryjšli ź Sibiry
Heta adbyłosia 23 tysiačy hod tamu.
Novyja daśledavańni hienomaŭ sučasnych i staražytnych žycharoŭ Amieryki, Sibiry i Akijanii paćvierdzili zasialeńnie kantynienta našymi prodkami praź Bierynhaŭ praliŭ 23 tysiačy hod tamu. Artykuł vyjdzie ŭ časopisie Science 24 lipienia, ścisła pra jaho raspaviadaje Daily Mail.
Ludzi prajšli praź Bierynhaŭ praliŭ pa «suchaputnym moście», što ŭtvaryŭsia ŭ čas apošniaha ledavikovaha pieryjadu. Pry hetym pierachod adbyvaŭsia nie chvalami, a za karotki adrezak času.
Ale paśla pierachodu praź Bieranhaŭ praliŭ nie paźniej za 23 tysiačy hod tamu čałaviek spyniŭsia. Kala 8 tysiač hod prodki sučasnych indziejcaŭ praviali ŭ Bierynhii — vobłaści na terytoryi sučasnych Čukotki i Alaski, a taksama ciapierašniaha pralivu.
Tolki paśla taho, jak lod adtajaŭ kala 13 tysiač hod tamu čałaviek rušyŭ na poŭdzień Amieryki — i zasvojvaŭ kantynient ź vielmi vysokaj chutkaściu. U hety čas vandroŭniki padzialilisia na dźvie haliny-narodnaści, što dali pačatak mnostvu narodaŭ Amieryki. I tolki 5,5 tysiač hod tamu adbyłasia jašče adna mihracyja — eskimosy i inuity zasialili arktyčnyja terytoryi Paŭnočnaj Amieryki.
«Jašče jość niapeŭnaść u datach mihracyi i padzialeńnia na paŭnočnyja i paŭdniovyja amierykanskija papulacyi, — kaža suaŭtar daśledavańnia, prafiesar Jun Son z Kalifarnijskaha univiersiteta ŭ Bierkli (ZŠA). — Ale jak tolki my atrymajem bolš staražytnych paśladoŭnaściej hienomaŭ, my zmožam nazvać dakładny čas mihracyj».
Daśledavańnie pakazała, što ni jeŭrapiejcy, ni palenizijcy nie zrabili ŭniosak u hienietyčnuju spadčynu karennych amierykancaŭ. Adroźnieńni miž narodami Amieryki, kažuć daśledčyki, jość pieravažna vynikam vyklučna samastojnaha raźvićcia čałavieka, a nie źmiašeńnia ź inšymi hrupami narodaŭ. «Čužyja» hieny imavierna dastalisia chiba aleutam, jakija žyvuć na samaj poŭnačy Amieryki, praź ich kantakty z aŭstrała-miełaniezijskim i sibirskim čałaviekam. Zatym ad aleutaŭ «čužyja» hieny raspaŭsiudzilisia pa abiedźviuch papulacyjach karennych amierykancaŭ.
Kamientary