Kab sudzić kamunistyčnuju ideałohiju i palityčnyja represii XX stahodździa, treba spačatku pravieści sudovuju reformu, zajaviła ŭ Mahilovie kandydatka ŭ prezidenty Biełarusi Taćciana Karatkievič.
U kancy červienia Karatkievič vykazałasia ab nieabchodnaści pavahi pačućciaŭ kamunistaŭ, i heta vyklikała peŭny hramadski rezanans. «Treba pavažać usie etapy historyi, nie treba ničoha vykreślivać. Bo jość ludzi, jakija i heta [kamunizm] pavažajuć, jany majuć svaje pačućci. A pierajmienavańnie vulic — nie takaja tannaja sprava», — zajaviła jana na sustrečy z hramadskaściu ŭ Hrodnie.
Kamientujučy hetyja słovy 14 lipienia, palityk adznačyła, što pierš kazała ab dekamunizacyi, jakaja, na jaje dumku, «pavinna prachodzić mirna». «Mnie padabajecca ideja stvaryć park u lesie, naprykład, kudy možna zvazić hetyja pomniki. A pra pačućci… u mianie byŭ dzied, jaki byŭ siabram partyi ŭsio žyćcio, byŭ dyrektaram saŭhasa-miljońnika. Ja jaho nie źviazvaju z tymi ludźmi, jakija byli kamunistami i pa ich inicyjatyvie byli represii, razbureńnie instytutaŭ relihii», — skazała jana.
Na dumku Karatkievič, u Biełarusi nie pavinny razburacca pomniki, jak va Ukrainie, bo «heta niehatyŭ, a treba heta rabić mirnym šlacham».
Da suda nad kamunistyčnaj ideałohijaj, jakaja pryviała da masavych represij, nieabchodna pravieści sudovuju reformu i viarnuć davier sudu, śćviardžaje Taćciana Karatkievič. «Potym zrabić dastupnymi usie dakumienty, kab viedać, jak i što było, kab možna było znajści vinavatych. Jak heta ŭ Polščy adbyłosia. I heta nie pavinien vyrašać adzin čałaviek. Treba pamianiać prezidenta, padzialić uładu na try haliny, kab sudovaja sistema pracavała spraviadliva. I heta treba harantavać», — ličyć jana.
Ciapier čytajuć
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary