Paśla 23 červienia atrymać šenhienskuju vizu možna budzie tolki pa adbitkach palcaŭ
Z 23 červienia 2015 h. płanujecca ŭviadzieńnie ŭ ekspłuatacyju vizavaj infarmacyjnaj sistemy (Vis) va ŭsich pasolstvach i konsulskich ustanovach dziaržaŭ — udzielnic Šenhienskaha pahadnieńnia, jakija znachodziacca na terytoryi dziaržaŭ, jakija ŭvachodziać u prahramu Uschodniaha partniorstva, da jakich naležyć i Biełaruś, paviedamlaje Konsulski adździeł Pasolstva Polščy.
Vizavaja infarmacyjnaja sistema pryznačana dla abmienu vizavymi dadzienymi pamiž dziaržavami — udzielnikami Šenhienskaha pahadnieńnia. Asnoŭnymi metami Vis źjaŭlajecca palahčeńnie kantrolu na źniešnich miežach i pavyšeńnie biaśpieki, u tym liku dla zajaŭnikaŭ.
Uviadzieńnie Vis supravadžajecca abaviazkovym pradastaŭleńniem usimi zajaŭnikami va ŭzroście starejšym za 12 hadoŭ bijamietryčnych dadzienych (adbitki palcaŭ i bijamietryčnaja fatahrafija), adznačajecca ŭ paviedamleńni.
Paśla 23 červienia 2015 h. pry pieršaj padačy chadajnictva na atrymańnie vizy nieabchodnaja asabistaja jaŭka ŭsich zajaŭnikaŭ, jakija dasiahnuli ŭzrostu 12 hadoŭ, u metach zboru bijamietryčnych dadzienych (adbitki ŭsich palcaŭ i fota).
Paśla atrymańnia adbitkaŭ palcaŭ jany zachoŭvajucca ŭ Vis ciaham 59 miesiacaŭ i mohuć paŭtorna vykarystoŭvacca pry padačy novych vizavych chadajnictvaŭ.
Takim čynam, nieabchodnaść u asabistaj jaŭcy zajaŭnika moža adpaści ciaham piaci hadoŭ z momantu apošniaj pracedury źniaćcia adbitkaŭ palcaŭ, navat u tym vypadku, kali hetaja pracedura rabiłasia ŭ pradstaŭnictvie inšaj dziaržavy-ŭdzielnicy Šenhienskaj damovy. U takim vypadku ŭ vizavaj ankiecie Vam varta abaviazkova paznačyć datu apošniaha źniaćcia adbitkaŭ palcaŭ, paviedamlaje konsulski adździeł.
Praz dostup da bazy dadzienych Vis pamiežnyja orhany majuć mahčymaść pravieryć asobu kožnaha hramadzianina, jaki ŭjazdžaje na terytoryju dziaržaŭ — udzielnic Šenhienskaha pahadnieńnia.
Ad abaviazku pradastaŭleńnia adbitkaŭ palcaŭ vyzvalenyja tolki asoby, jakija fizična nie ŭ stanie heta zrabić, naprykład, pry adsutnaści palcaŭ.
Kali ich mienš za 10, to zdymajucca adbitki tych palcaŭ, jakija majucca. Pry najaŭnaści inšych časovych pieraškod (naprykład, pry pierałomie palcaŭ albo z-za znachodžańnia ŭ špitali z pryčyny ciažkaha zachvorvańnia abo traŭmy) nieabchodnaść pradastaŭleńnia adbitkaŭ palcaŭ taksama moža adpaści.
Adnak heta pavinna być zroblena pry nastupnaj padačy vizavaha chadajnictva. U vypadku ŭźniknieńnia sumnieńniaŭ rekamiendujecca źviazacca praz kantaktny farmular na internet-staroncy.
Kamientary