Prakuratura Partyzanskaha rajona Minska nakiravała siońnia ŭ sud Partyzanskaha rajona stalicy kryminalnuju spravu pa abvinavačvańni mužčyny 1959 naradžeńnia pa č.2 art.340 KK (zaviedama iłžyvaje paviedamleńnie ab niebiaśpiecy, ździejśnienaje paŭtorna), jaki nieadnarazova pahražaŭ supracoŭnikam velcom raspylić chłorku ŭ ich ofisach.
Pra heta paviedamiŭ staršy pamočnik prakurora Minska pa pravavym zabieśpiačeńni, infarmacyi i hramadskich suviaziach Siarhiej Bałašoŭ.
Pavodle dadzienych śledstva, hety čałaviek niekalki razoŭ telefanavaŭ 29 i 30 śniežnia 2014 hoda sa svajho mabilnaha telefona ŭ koł-centr velcom. «Jon pieradaŭ supracoŭnikam koł-centra vusnyja zaviedama iłžyvyja paviedamleńni pra svoj namier 30 śniežnia prybyć u centry prodažu velcom i raspylić u pamiaškańniach i na prylehłaj terytoryi chłorku, prymianić nieviadomuju kisłatu, spalić najaŭnaje tam abstalavańnie», — raspavioŭ Siarhiej Bałašoŭ.
Dla pravierki infarmacyi, jakaja pastupiła ad abvinavačanaha, u ofisy kampanii vybyvali apieratyŭnyja słužby MNS i MUS. «U suviazi z paviedamleńniami na roznyja pieryjady času była prypynienaja dziejnaść čatyroch ofisaŭ velcom, raźmieščanych u Minsku. Pryčynienaja ŭ vyniku prypynieńnia dziejnaści ofisaŭ škoda skłała bolš za Br26,6 młn», — raspavioŭ pradstaŭnik prakuratury.
Abvinavačany ŭžo byŭ sudzimy ŭ žniŭni 2013 pa č.1 art.340 KK. «U dačynieńni da abvinavačanaha, z ulikam abstavinaŭ ździejśnienaha złačynstva, a taksama dadzienych pra asobu, prymieniena miera strymańnia ŭ vyhladzie zaklučeńnia pad vartu», — rastłumačyli ŭ prakuratury.
Kamientary