Internet-hihant Google taksama zacikaŭleny i ŭ aŭtaindustryi. Jašče ŭ mai 2014 hoda byŭ pakazany pieršy pratatyp pakul biezymiennaha bieśpiłotnaha aŭtamabila. Ciapier pratatyp značna dapracavany. Heta zavieršany aŭtamabil, pišuć raspracoŭščyki na Google+.
«Mašyna, što my pradstavili ŭ mai, była rańnim makietam – nie pracavali navat fary, – pryznajucca raspracoŭščyki. Z taho času my zbudavali mnostva «pratatypaŭ pratatypaŭ».
Kožny z tych aŭtamabilaŭ byŭ stvorany dla pravierki asobnaj funkcyi: kiravańnia, tarmazoŭ, kampjutaraŭ, sensaraŭ i inšych. Ciapier usie častki sabranyja ŭ adno.
Inžyniery praviaduć śviaty na testavym treku. «Spadziajemsia pabačyć vas na vulicach paŭnočnaj Kalifornii ŭ nastupnym hodzie», – pišuć jany. Na ŭsialaki vypadak kiroŭcy-testyroŭščyki pakul buduć mieć ručny kantrol nad mašynami.
«Huhłamabil» vykarystoŭvaje zamiest čałaviečaha kiravańnia źviestki z Google Street View, lidar (śvietłavy dalnamier z 64 łazieraŭ) na dachu, radary napieradzie dy inšyja techničnyja srodki. Sistema paśpiachova adroźnivaje piešachodaŭ ad nieruchomych abjektaŭ. Pakul bieśpiłotnyja aŭtamabili majuć prablemy z rucham pad zalevami i zaviejami.
Na dumku suzasnavalnika Google Siarhieja Bryna, bieśpiłotnyja aŭtamabili dazvolać palepšyć situacyju z avaryjami i zatorami, a taksama paniziać patrebu ŭ pryvatnym aŭtamabili i razhruziać parkoŭki.
Google nie źbirajecca sama vyrablać aŭtamabili biez rula, pieradaje CNet sa spasyłkaj na Wall Street Journal. Kampanija šukaje partnioraŭ dla taho, kab puścić bieśpiłotnyja aŭtamabili ŭ kamiercyjnuju vytvorčaść pa zaviaršeńni vyprabavańniaŭ. Biznes-madel takoha partniorstva pakul abmiarkoŭvajecca.
Ciapier čytajuć
Žančyny ŭ achovie i braniavany kartež. Jak Ukraina arhanizavała biaśpieku vizitu Cichanoŭskaj u Kijeŭ6
Kamientary