«Byłych kramloŭcaŭ nie byvaje». Piać faktaŭ pra novaha ministra abarony Andreja Raŭkova
Siońnia Alaksandr Łukašenka pryznačyŭ novaha ministra abarony. Im staŭ 47-hadovy kamandujučy vojskami Paŭnočna-zachodniaha apieratyŭnaha kamandavańnia Andrej Raŭkoŭ.
Ziamlak Lva Sapiehi
Budučy ministr abarony naradziŭsia ŭ maleniečkaj vioscy Raviaki Biešankovickaha rajona. Vioska maje ŭsiaho 7 dvaroŭ, praź jaje ciače rečka z pryhožaj nazvaj Čarnahaścianka. Adnak, jak paviedamlaje biešankovickaja rajonka «Zara», u vioscy zimavać zastajecca tolki adna siamja Vasila i Taćciany Raŭkovaj. My parazmaŭlali z žančynaj, adnak jana skazała, što jany nie źjaŭlajucca śviakami ministra, a tolki adnafamilcami. Nikoha z svajakoŭ Raŭkova ŭ Raviakach nie zastałosia. Cikava, što zusim niedaloka ad Raviakaŭ (kiłamietraŭ z 10) znachodzicca vioska Astroŭna, radzima kanclera VKŁ Lva Sapiehi.
Kramloviec
U 1988 hodzie Andrej Raŭkoŭ skončyŭ z załatym miedalom Maskoŭskaje vyšejšaje ahulnavajskovaje kamandnaje vučylišča. Varta adznačyć, što hetaje vučylišča raźmiaščałasia niepasredna ŭ Kramli. Tamu vykładčyki, kursanty i kamandziry navat udzielničali ŭ žyćci savieckaha ŭrada. Naprykład, vykarystoŭvalisia ŭ achovie ŭradavych ustanovaŭ, źjezdaŭ. Kursantaŭ tamu prosta tak i nazyvali «kramloŭcy». Paru hadoŭ tamu hazieta «Vo słavu Rodiny» radasna paviedamlała, što «Byłych kramloŭcaŭ nie byvaje».
Kamandzir viciebskaha desanta
Karotki termin Andrej Raŭkoŭ byŭ kamandziram 103-j asobnaj hvardziejskaj mabilnaj bryhady. Heta elitnaja častka desantnikaŭ. Z 2006 pa 2012 hod zajmaŭ pasady načalnika apieratyŭnaha adździeła – namieśnika načalnika štaba Zachodniaha apieratyŭnaha kamandavańnia.
Varta adznačyć, što Raŭkoŭ kavaler ordena «Za słužbu Radzimie» III stupieni. Uručeńnie adbyvałasia sioleta ŭ mai.
Źviartaje na siabie ŭvahu, što Raŭkoŭ etničny biełarus. Da hetaha ministram byŭ Juryj Žadobin, jaki naradziŭsia ŭ Dnieprapiatroŭsku, a vučyŭsia ŭ Rasii. Alaksandr Čumakoŭ rodam z Rastoŭskaj vobłaści. Tolki Leanid Malcaŭ byŭ uradžencam Biełarusi. Apošnija hady kren, što siarod siłavikoŭ na vysokich pasadach bolšaść składajuć niebiełarusy pacichu staŭ vypraŭlacca.
Deputat ad Barysava
Raŭkoŭ nikoli nie žyŭ u stalicy, apošnija hady jon žyŭ u Barysavie. Sioleta Andrej Raŭkoŭ byŭ abrany deputatam Minskaha abłasnoha savieta deputataŭ ad horada Barysava. Jon bałatavaŭsia pa 26-j Ladziščanskaj akruzie. Varta adznačyć, što barysaŭski mikrarajon Ladzišča nasialajuć u asnoŭnym vajskoŭcy i ich svajaki. Akruha ŭ Raŭkova była biezalternatyŭnaj. U vyniku pa aficyjnych ličbach za jaho prahałasavała 82% (9782 čałavieki) z tych, što pryjšli na ŭčastki. Praŭda, jak deputat Raŭkoŭ nijak siabie nie prajaviŭ.
Z hoda ŭ hod kaža adno i toje ž
Apošniaja historyja chutčej zamiest aniekdota. Štohod u žniŭni vypuskniki ŭstanovaŭ vajskovaj adukacyi papaŭniajuć vajskovyja častki. Jasna, što niechta z načalstva havoryć vitalnaje słova navičkam u haziecie «Vo słavu Rodziny». Kolki razoŭ hetaja mahčymaść pradstaŭlałasia i Andreju Raŭkovu. Dziŭna, što z hoda ŭ hod jahonyja słovy nijak nie mianiajucca:
«Uzrovień prafiesijnaj padrychtoŭki ciapierašnich vypusknikoŭ u cełym dobry, nycikaŭ siarod ich nie zaŭvažana. Usich maładych aficeraŭ my sustreli hodna, nichto ź ich ničym nie abdzieleny i nie pakryŭdžany. Nastroj u lejtenantaŭ bajavy, što nie moža nie radavać. Usie prybyli ŭ vajskovyja častki sa śviežymi idejami, žadańniem słužyć i prynosić karyść. Adnym słovam, aficerskaje papaŭnieńnie vyklikaje davier. Ad dušy žadaju ŭsim vypusknikam VVNU ščasnaha stanaŭleńnia, pośpiechaŭ u prafiesijnym i słužbovym roście».
Chacia, mahčyma, heta pytańni nie da Andreja Raŭkova, a da aŭtara materyjałaŭ kapitana zapasu Mikałaja Makareviča.
Za 2011 hod:
Za 2013 hod:
Za 2014 hod:
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie8
Kamientary