Alaksandr Łukašenka 25 lipienia padčas rabočaj pajezdki ŭ Minski rajon pastaviŭ zadaču ŭ karotkija terminy zaviaršyć uborku palehłych chlaboŭ, paviedamlaje pres-słužba prezidenta.
Kiraŭnik dziaržavy zasłuchaŭ apieratyŭnuju infarmacyju ab stanie pasievaŭ ziernievych kultur. Jon padkreśliŭ, što «samaja hałoŭnaja zadača, jakaja staić siońnia pierad ahraryjami, — maksimalna chutka ŭbrać hetak zvanuju palehlicu, kab nie dapuścić strat uradžaju».
«Jak by ni było składana, hety chleb treba ŭbrać vokamhnienna. Maksimum try-čatyry dni. Hałoŭnaja zadača siońnia — ubrać palehłyja pasievy. Heta mianie bolš za ŭsio chvaluje. Usio astatniaje my zrobim, — skazaŭ Łukašenka. — Škada budzie chleba, jaki vyras, kali my jaho nie voźmiem. Stracić taki chleb — heta złačynstva».
Łukašenka daručyŭ Kamitetu dziaržkantrolu i inšym śpiecyjalistam prakantralavać vykanańnie hetaha daručeńnia.
«Praz dva-try dni praviercie i znajdzicie, dzie kiepska pracujuć z palehłymi ziernievymi. Heta tyčycca ŭsich abłaściej», — skazaŭ jon.
Łukašenka daručyŭ nadać pilnuju ŭvahu struktury pasievaŭ i vykarystoŭvać najbolš ustojlivyja hatunki. «Davajcie pasiejem toje, što, vy ličycie, zdolnaje vystajać suprać liŭniaŭ i inšaha. Treba rabić usio dla taho, kab zachavać uradžaj i zmahacca z hetaj palehlicaj», — skazaŭ kiraŭnik dziaržavy.
Jon daručyŭ u nastupnym hodzie takim čynam arhanizavać pasiaŭnuju va ŭsim Minskim rajonie, kab možna było paraŭnać atrymanyja vyniki i vyznačyć efiektyŭnaść.
Havoračy pra struktury pasievaŭ, Łukašenka zapatrabavaŭ admovicca ad zaviedama stratnych i daručyŭ Minsielhascharču «bolš dakładna davodzić rekamiendacyi ahraryjam pa pradukcyjnaści i rentabielnaści tych ci inšych hatunkaŭ i kultur».
«Rabicie vysnovy ź sioletniaj pasiaŭnoj i ŭboračnaj i vydavajcie rekamiendacyi ŭžo zychodziačy z vopytu», — adznačyŭ Łukašenka.
Kiraŭnika dziaržavy prainfarmavali ab chodzie ŭboračnaj kampanii i vidach na ŭradžaj. Pa stanie na 25 lipienia pa krainie ziernievyja i zierniebabovyja kultury ŭbranyja na 549 tys. ha, što składaje 22,6% ad ahulnaj płoščy pasievaŭ. Namałočana bolš jak 2,1 młn. ton pry siaredniaj uradžajnaści 39 c/ha. Raps užo ŭbrany na 94% płoščaŭ. Namałočana 753,1 tys. ton pry siaredniaj uradžajnaści 22,5 c/ha. Čakajecca, što vałavy zbor ziernia biez uliku kukuruzy ŭ sielhasarhanizacyjach u śvirnavoj vazie składzie amal 8 młn. ton.
Łukašenka taksama naviedaŭ u Minskim rajonie zierniesušylny kompleks, dzie aznajomiŭsia z arhanizacyjaj pryjomki, suški, dapracoŭki i zachoŭvańnia ziernia i azimaha rapsu.
Ciapier čytajuć
Chitry rasijanin Jaŭhien z žonkaj i małym prydumali, jak biaspłatna pažyć u kvatery biełaruski13
Chitry rasijanin Jaŭhien z žonkaj i małym prydumali, jak biaspłatna pažyć u kvatery biełaruski
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2020
Kamientary