Ci zmohuć «viečna druhija» hałandcy stać pieršymi?
Siońnia adbudziecca druhi paŭfinalny matč čempijanatu śvietu pa futbole. Hiermanija budzie čakać niadzielnaha supiernika, im stanie pieramožca pary Arhiencina — Hałandyja.
Ci zmohuć hałandcy narešcie vyjhrać Mundyjal? Ci ŭsio ž Arhiencina pavinna pazmahacca za honar kantynientu. Jašče nikoli jeŭrapiejskija kamandy nie pieramahali na terytoryi Paŭdniovaj Amieryki.
Arhiencina – Hałandyja
Kaeficyjenty bukmiekieraŭ: Pieramoha Arhienciny — 2,4, ničyja — 3,0, pieramoha Hałandyi — 3,2.
Pačatak hulni: 23:00
Sudździa: Džunejt Čakir (Turcyja)
Historyja supraćstajańniaŭ: Kamandy syšlisia ŭ finale čempijanatu śvietu 1978 hoda ŭ Buenas-Ajresie. Asnoŭny čas skončyŭsia ničyjnym likam. A ŭ dadatkovy čas Marya Kiempies zabiŭ ci nie samy pryhožy hoł u finalnych pajadynkach mundyjalaŭ (hladzieć abaviazkova na adznacy 0:45). Arhiencina pieramahła 3:1.
Zorka Arhienciny – Hansała Ihuain
26-hadovy italjanskaha «Napali» adznačajecca na čempijanacie nie tolki samaj pryhožaj baradoj, ale svajoj hulnioj. Mienavita hoł Ihuaina prynios Arhiencinie pucioŭku ŭ paŭfinał, pakinuŭšy za bortam Bielhiju.
Ihuain naradziŭsia ŭ Breście. Praŭda, nie ŭ biełaruskim, a ŭ francuzskim. Sprava ŭ tym, što tam u toj čas hulaŭ jahony baćka Chorchie. U Hansała jość francuzskaje hramadzianstva, ale vystupać jon vyrašyŭ usio ž za Arhiencinu, choć prapanovy z Francyi byli davoli nastojlivymi.
Staleńnie Ihuaina prachodziła ŭ kłubie «Ryviet Płejt» (taja samaja arhiencinskaja kamanda, fanaty jakoj padčas hulniaj machajuć bieł-čyrvona-biełymi ściahami).
Za Hansała zmahalisia najlepšyja kłuby Staroha śvietu. U vyniku chłopiec vybraŭ madrydski «Reał», u składzie jakoha zabiŭ bolš za 100 hałoŭ. Ciapier jon hulaje za «Napali», jak niekali jahony słavuty ziamlak Dyjeha Maradona.
Ihuain žanaty z arhiencinskaj madellu Łusijanaj Sałazar. Sam futbalist, kažuć, vielmi hanarycca, što jahonaja žonka bolš za kaho z žonak kaleh padobnaja da pornaaktrysy.
Zorka Hałandyi – Robin van Piersi
30-hadovy napadajučy «Mančester Junajteda» zabiŭ užo try hały na hetym čempijanacie. Siońnia ŭ Niderłandach ad Robina čakajuć praciahu.
Zorny čas van Piersi pryjšoŭsia na vystupleńnie za łondanski «Arsienał». Varta zaŭvažyć, što ŭ toj čas jany vystupali razam ź biełarusam Alaksandram Hlebam. ŚMI tady jašče žartavali, nazyvajučy Hleba «navodčykam», a van Piersi — «strałkom».
Časam składvałasia ŭražańnie, što van Piersi ŭmieje prosta lotać na poli. Zabivać z samych niejmaviernych pazicyj. Ź minusaŭ adznačajuć jahony ehaizm.
Van Piersi naradziŭsia ŭ siamji tvorčych ludziej. Jahonaja mama — mastak i juvielir, a tata — skulptar. Paśla razvodu van Piersi žyŭ z baćkam.
U 21-hadovym uzroście Robin trapiŭ u bujny seks-skandał. Jon navat pravioŭ niekalki dzion u roterdamskaj turmie pa padazreńniu ŭ zhvałtavańni stryptyziorki. Adnak u vyniku praz adsutnaść dokazaŭ byŭ apraŭdany.
Hałandziec žanaty sa svajoj daŭniaj siabroŭkaj marakanskaha pachodžańnia Buchre. U pary dvoje dziaciej.
Prahnoz «NN»: Arhiencina pieramoža. Całkam jeŭrapiejskim finał u Paŭdniovaj Amierycy być nie moža.
Kamientary