Supracoŭnik HRU abviaściŭ siabie Viarchoŭnym Hałoŭnakamandujučym i prosić dapamohi ŭ Kramla
Supracoŭnik hałoŭnaha raźviedvalnaha ŭpraŭleńnia Rasii Ihar Hirkin, viadomy pad psieŭdanimam «Strałkoŭ», abviaściŭ siabie Viarchoŭnym Hałoŭnakamandujučym i źviarnuŭsia da Rasii pa vajennuju dapamohu.
Adpaviedny tekst jaho «pieršaha ŭkaza» raspaŭsiudžvajuć u vyhladzie ŭlotak u Słaviansku i Kramatorsku.
«Prymajučy pad uvahu nadzvyčajny charaktar situacyi ŭ krainie, raźviazany Kijeŭskaj chuntaj hienacyd danieckaha nasielnictva i pahrozu interviencyi z boku NATA, źviartajusia da Rasijskaj Fiederacyi z prośbaj ab akazańni DNR vajennaj dapamohi», — skazana va «ŭkazie».
Strałkoŭ taksama vyrašyŭ pierapadparadkavać jamu «jak viarchoŭnamu hałoŭnakamandujučamu DNR ŭsie ŭvieś čas dysłakavanyja na terytoryi respubliki voinskija farmiravańni, orhany biaśpieki, milicyi, mytni, pamiežnyja słužby, prakuratury, a taksama inšyja vajenizavanyja struktury».
«Kamandziram z hetaha času vykonvać tolki maje zahady i rasparadžeńni», — zahadaŭ Strałkoŭ.
Akramia taho, jon adkryta abviaściŭ vajnu ukrainskim siłavikam. «Uvieści na terytoryi DNR režym kontrterarystyčnaj apieracyi». U Rasii mienavita tak nazyvajucca padobnyja apieracyi.
«U ramkach KTO ŭsie bajeviki ŭkrainskich nieanacysckich hrupovak (t. zv. «Nacyjanalnaja hvardyja», Pravy Siektar, «bataljon Laško» i inš.) padlahajuć zatrymańniu, a ŭ vypadku ŭzbrojenaha supracivu — źniščajucca na miescy», — upeŭnieny Strałkoŭ.
«Pravaachoŭnym orhanam respubliki zabiaśpiečyć kryminalny pieraśled vierchavodaŭ Kijeŭskaj chunty i inšych asob, jakija majuć dačynieńnie da padbuchtorvańnia, arhanizacyi i ździajśnieńnia masavych zabojstvaŭ na terytoryi DNR: I. Kałamojskaha, P. Nalivajčanki, A. Parubija, A. Avakava, Ju. Cimašenki, A. Turčynava, A. Jacaniuka, A. Laško, A. Arciomienki a taksama hramadzian ZŠA Dž. Brenana, V. Nułand, Dž. Psaki».
Jon taksama adznačyŭ, što «usie sałdaty i aficery uzbrojenych sił, unutranych vojskaŭ, SBU, MUS i inšych vajenizavanych struktur Ukrainy z hetaha momantu ličacca niezakonna prysutnymi na terytoryi DNR».
Strałkoŭ patrabuje, kab na praciahu 48 hadzin jany prysiahnuli na viernaść DNR albo pakinuli jaje terytoryju.
«Usim, chto pierajšoŭ pad kamandavańnie uładaŭ DNR, harantujecca zachavańnie voinskich i śpiecyjalnych zvańniaŭ, hrašovaha zabieśpiačeńnia i sacyjalnych harantyj (pry ŭmovie niedatyčnaści da ździajśnieńnia ciažkich i asabliva ciažkich złačynstvaŭ)», — abiacaje rasijski dyviersant.
Kamientary