U Strasbury na pačatku siońniašniaha plenarnaha pasiedžańnia Eŭraparlamentu jaho prezydent Chasep Bareł pryvitaŭ lidera abjadnanaj biełaruskaj apazycyi Alaksandra Milinkieviča, jaki pryjechaŭ, kab nazirać za siońniašnimi debatami ab rezalucyi što da sytuacyi ŭ Biełarusi – hetuju rezalucyju miarkujecca ŭchvalić u čaćvier.
Čakajecca, što ŭ hetym dakumencie buduć pałažeńni – ab zabaronie na ŭjezd biełaruskich čynoŭnikaŭ u krainy Eŭraźviazu, ab aktyvach i hrašoch Alaksandra Łukašenki, ab prezydenckich vybarach i budučaj palitycy Eŭraźviazu dačynna Biełarusi.
Niekatoryja eŭradeputaty na znak salidarnaści ź Biełaruśsiu majuć bieł-čyrvona-biełyja šaliki abo inšuju atrybutyku nacyjanalnych biełaruskich koleraŭ.
Alaksandar Milinkievič padčas svajho vizytu ŭ Strasbur daŭ interviju telekanału «Eŭrańjuz», u jakim skazaŭ, što demanstracyi, praviedzienyja paśla prezydenckich vybaraŭ, dali ludziam nadzieju.
«Ja vieru, što paśla hałasavańnia vielmi šmat ludziej u Biełarusi, šmat našych hramadzianaŭ pieraadoleli strach, što isnuje ŭ našaj krainie. Siońnia jany mohuć zmahacca za svoj honar i za svaju budučyniu, heta jość vialikim vynikam i dasiahnieńniem dla nas, – skazaŭ Alaksandr Milinkievič. – Ciapier apazycyja pradbačyć masavy pratest, jaki moža adbycca ŭ toj čas, kali Alaksandar Łukašenka budzie treci raz davać prysiahu ŭ hetyja vychodnyja».
Kamientary