Suśvietnaja arhanizacyja achovy zdaroŭja (SAAZ) abviaściła ab praviadzieńni hramadskich kansultacyj pa prajekcie rekamiendacyj ab abmiežavańni spažyvańnia cukru.
Ekśpierty prapanujuć źnizić sutačnuju normu ŭdvaja.
Kamientarami ŭ suviazi z prajektam moža padzialicca luby achvočy na veb-sajcie SAAZ z 5 pa 31 sakavika 2014 hoda. Paśla kančatkovaj dapracoŭki krainy atrymajuć rekamiendacyi pa abmiežavańni spažyvańnia cukru ŭ metach pamianšeńnia prablem sa zdaroŭjem nasielnictva, takich jak atłuścieńnie i zubny karyjes.
Pavodle novych rekamiendacyj, sutačnaja norma cukru — da 5% ad ahulnaj kolkaści spažyvanych kałoryj.
Heta pryblizna 25 h, ci šeść čajnych łyžak u dzień dla darosłaha čałavieka z narmalnym indeksam masy cieła (IMT).
U adpaviednaści ź dziejnymi ŭ ciapierašni čas rekamiendacyjami SAAZ 2002 hoda, spažyvańnie cukru pavinnaje być na ŭzroŭni mienš za 10% ad ahulnaj kolkaści štodnia spažyvanych kałoryj.
Pry hetym śpiecyjalisty adznačajuć, što značnaja častka ŭsich typaŭ cukroŭ, spažyvanych u ciapierašni čas, «schavanaja» ŭ pierapracavanych praduktach, jakija navat nie ličacca sałodkimi.
Da prykładu, adna stałovaja łyžka kietčupu źmiaščaje kala 4 h (prykładna adnu čajnuju łyžku) cukru. Adna banka sałodkaj hazavanaj vady źmiaščaje da 40 h (prykładna 10 čajnych łyžak) cukru.
Rekamiendacyi SAAZ raspaŭsiudžvajucca nie tolki na cukar, dadavany ŭ pradukty, ale i na toj, jaki źmiaščajecca ŭ miodzie, siropach, sokach i fruktovych kancentratach.
Jak zajaŭlajuć śpiecyjalisty arhanizacyi, cukar staŭ asnoŭnym vinavatym u karyjesie i hłabalnaj epidemii atłuścieńnia, jakaja zakranuła da paŭmiljarda čałaviek va ŭsim śviecie i praciahvaje raści, asabliva ŭ krainach, jakija raźvivajucca.
Kamientary