Łukašenkaŭskija telekanały apraŭdvajuć uvod Rasijaj vojskaŭ va Ukrainu, ale najbolš dakazvajuć škodnaść pratestaŭ
Jak dziaržaŭnyja ŚMI Biełarusi paviedamlajuć pra rasiejskuju intervencyju va Ukrainie.
Telekanał STV u pieradačy «Tydzień» raspavioŭ pra dazvoł z boku rasiejskaj Rady Federacyi na vykarystańnie vajskovaj siły dla abarony rasiejskamoŭnaha nasielnictva va Ŭkrainie. byli pakazanyja kadry vuličnych pratestaŭ, jakija žurnalisty nazvali «mitynhami suprać rusafobstva».
«Radykały ŭciahvajuć u vajnu ŭsio novyja i novyja rehijony. Toje, što raniej tyčyłasia tolki Kijeva, zaraz zakranaje žycharoŭ Kryma, Charkaŭskaj i Danieckaj abłaściej, dzie taksama prajaŭlajucca ŭltrapravyja nastroi aktyvistaŭ Majdana, nieafašysckija pohlady jakich pryciahnuli da realnaj pahrozy vajny».
U pieradačy pakazali voks-pop ź mienskich vulic, dzie ludzi adkazvali na pytańni pra Ŭkrainu z rytorykaj «aby nie było vajny, chočacca miru va ŭsim śviecie». Toje samaje hučała ŭ pračytanych žurnalistami kamentarach z forumaŭ tut.by.
Telekanał ANT u pieradačy «Kontury» skancentravaŭsia na ekanamičnych aspekcie kanfliktu. Tak, u pieradačy paviedamili, što dla adnaŭleńnia funkcyjanavańnia Ŭkrainie patrebna 130 miljardaŭ dalaraŭ ZŠA. Žurnalisty adznačyli, što na fonie paŭzučaj devalvacyi hryŭni, a taksama skasavańnia skidki na pastaŭki rasiejskaha hazu takaja sytuacyja pahražaje krainie defołtam. U pieradačy raspaviali, što kanflikt nanios udaru pa turystyčnym biznesie — u maskoŭskich turahienctvach masava viartajuć pucioŭki, nabytyja na letni sezon va Ŭkrainu.
«Tym časam novyja ŭłady tolki abvastrajuć kanflikt, uvodziačy dyskryminacyjny dla rasiejskamoŭnych zakon pra movy», — adznačyli žurnalisty ANT.
Praciahvajučy temu ekanamičnaj pahrozy, žurnalisty pieradačy raspaviali, što kaviarni i kramy ŭ centry Kijeva, razburanyja paśla padziejaŭ Eŭramajdanu, nichto nie adnaŭlaje. Taksama razrabavanyja tavary šmatlikich kramaŭ. «Šarykaŭskaje «adniać i padzialić»» — tak prakamentavali žurnalisty stan Kijeva.
«Uzbrojenyja ludzi mohuć na tolki rabavać kramy, ale i ŭryvacca ŭ damy ludziej, pahražajučy im raspravaj, zabirajuć, što pažadajuć», — prahučała padčas videasiužetu. Cikavyja kamentar dali žurnalisty prahramy, pakazvajučy kadry «leninapadu»:
«Dziasiatki pomnikaŭ Leninu razburanyja, u toj čas, kali zamiežnyja kalekcyjanery prapanoŭvali za ich vialikija hrošy. Možna ž było demantavać ich i sabrać u adnym miescy, stvaryŭšy muzej savieckaj epochi, jak toje zroblena ŭ Litvie», — skazali žurnalisty.
U jakaści hościa prahramy vystupiŭ palitolah Vadzim Hihin, jaki tak prakamentavaŭ sytuacyju:
«Ukraina raździelenaja, ludzi nienavidziać adno adnaho, ułada Jaceniuka absalutna biaździejsnaja, heta poŭnaja katastrofa. Razam z tym Maskva nie raźličvaje na realnyja vajennyja dziejańni na terytoryi Ŭkrainy. Ja voś zaraz heta kažu i nia vieru. Heta varjactva, što Rasieja moža vajavać z Ukrainaj. Tut vielmi pravilnaja i ŭzvažanaja pazycyja biełaruskaha boku, jaki trymajecca neŭtralitetu i, majučy peŭnyja abaviazki pierad Rasiejaj, nie ŭmiešvajecca ŭ kanflikt».
Telekanał Biełaruś-1 u prahramie «Hałoŭny efir» daŭ chranalahičny pieralik padziejaŭ, jakija adbyvalisia vakoł kanfliktu: adzinahałosnaje hałasavańnie Rady Federacyi Rasiei, abviaščeńnie bajavoj hatoŭnaści va Ŭkrainie, mitynhi pa ŭsioj krainie jak u padtrymku, tak i suprać novaj ułady, pierachod pad jurysdykcyju Siarhieja Aksionava paŭvostrava Krym, pryznačeńnie na 30 sakavika referenduma, jaki vyznačyć status Kryma.
«Što budzie dalej — nieviadoma. Adzina, što možna adznačyć, što kanflikt prynosić zvyčajnym hramadzianam Ukrainy ekanamičnyja ciažkaści», — adznačyli žurnalisty telekanała.
Kamientary