Babrujski mižharnizonny vajenny sud pryznaŭ vinavatym małodšaha opierupaŭnavažanaha adździaleńnia kryminalnaha vyšuku Kryčaŭskaha RAUS Sinicyna ŭ pieravyšeńni słužbovych paŭnamoctvaŭ i naniasieńni ciažkich cialesnych paškodžańniaŭ.
Nahadajem, u červieni Śledčy kamitet rasśledavaŭ kryminalnuju spravu ab pieravyšeńni słužbovych paŭnamoctvaŭ u dačynieńni da šerahu supracoŭnikaŭ Kryčaŭskaha RAUS, jakija padazravalisia ŭ źbivańni zatrymanaha ŭ śniežni 2012 hoda. Adzin ź ich, staršy siaržant milicyi Sinicyn, byŭ uziaty pad vartu.
Jak paviedamiŭ staršynia Babrujskaha mižharnizonnaha vajennaha suda Juryj Rutkoŭski, sprava Sinicyna była vyłučana ŭ asobnuju vytvorčaść. 31 kastryčnika jon byŭ asudžany na padstavie artykułaŭ ab pieravyšeńni słužbovych paŭnamoctvaŭ i naŭmysnym pryčynieńni ciažkaha cialesnaha paškodžańnia.
«Kančatkovaja miera pakarańnia jamu pryznačana ŭ vyhladzie pazbaŭleńnia voli terminam na šeść hadoŭ papraŭčaj kałonii va ŭmovach uzmocnienaha režymu, biez kanfiskacyi majomaści, z pazbaŭleńniem prava zajmać pasady, źviazanyja z vykanańniem arhanizacyjna-rasparadčych abaviazkaŭ, na piać hadoŭ, z pazbaŭleńniem śpiecyjalnaha zvańnia «staršy siaržant milicyi», — raskazaŭ Rutkoŭski.
Prysud u dačynieńni da Sinicyna pakul nie nabyŭ zakonnuju moc. «Jon vinavatym siabie nie pryznaŭ», — adznačyŭ staršynia vajennaha suda.
Jak raniej paviedamlała maci paciarpiełaha žychara Kryčava, jaje syna biespadstaŭna padazravali ŭ kradziažy. Paśla źbivańnia małady čałaviek znachodziŭsia ŭ ciažkim stanie i byŭ špitalizavany.
Pieršapačatkova spravaj zajmaŭsia KDB, a potym jana była pieradadziena ŭ Śledčy kamitet.
62‑hadovaja biznesvumen i miljanierka Iryna Ciareščanka padzialiłasia historyjaj svajho kachańnia z mužčynam, na 20 hadoŭ małodšym za jaje6
Kamientary