Sieviaryniec na voli

Dzieści pad Dziaržynskam fatohraf Siarhiej Hudzilin pačaŭ čytać fejsbuk. «O, Barys Harecki piša, što Sieviarynca pasadzili na ciahnik».

Spyniajem mašynu, jakoj jedziem u Kuplin. Telefanuju Paŭłu. «Źmicier, kažy chutka, sadzicca batareja ŭ mabilniku. Tak, užo na Minsk jedu». Suviaź na hetym abryvajecca. Bolej dazvanicca da Sieviarynca niemahčyma. Pavaročvajem nazad na stalicu.

Ciahnik prybyvaje a 8:42. Jašče paŭtary hadzinu času. Na vakzale ŭžo śviet ludziej. Pačynajuć pacichu padciahvacca žurnalisty. Chacia niekatoryja jašče źviečara pajechali ŭ Pružany, kab nie spaźnicca.

U asnoŭnym heta siabry-adnapartyjcy Vital Rymašeŭski, Alaksiej Šein, Dzianis Sadoŭski, Hanna Šapućka. Byli pradprymalnik Aleś Makajeŭ, pravaabaronca Ludmiła Hraznova, maładafrontaŭcy Źmicier Daškievič, Nasta Pałažanka, Mikoła Dziemidzienka. A voś pradstaŭnikoŭ inšych palityčnych partyj nie było zusim. Ranica, subota. Mo praspali?

Źbirajucca nie tolki Paŭłavy adnadumcy. Źbirajucca na pieronie i ludzi z racyjami dy dubinkami. Asabliva nie padabajucca takim ludzi z fotaaparatami. Spačatku pierad mnoj paviali Alesia Pileckaha z «Jeŭraradyjo» i Alaksandra Vasiukoviča, a potym užo padyšli i da Siarhieja Hudzilina. Paviali ŭ aparniak.

«U pamiaškańnie, dzie ŭ nas nibyta praviarali dakumienty, zajšła prybiralščyca. Starlej joj z hanku adžoh: «Vy za musaram ci prybirać?» -- raskazvaŭ Hudzilin. Praz hadzinku žurnalistaŭ usich adpuścili, ale rabotu sarvali.

Vital Rymašeŭski hučna pa-rasiejsku staŭ źviartacca da ludziej na pieronie: «Pahladzicie, što robicca. Nie dajuć sustreć palitviaźnia Paŭła Sieviarynca». Śledam za žurnalistami paviali i Rymašeŭskaha.

Ciahnik «Brest – Maskva» prybyvaje. Vahon №10. Pavieł pakazvajecca ŭ dźviarach apošnim. Vitalna ŭzdymaje ruki. A potym prosić chłopcaŭ dapamahčy dastać rečy. Dziemidzienka, Jaromienak, Daškievič, Šein kidajucca ŭ vahon, doŭha razhružajučy Paŭłavy pažytki.

Z Pryvakzalnaj płoščy 19 śniežnia 2010 hoda Sieviaryniec išoŭ na paślavybarčyja pratestu. Siudy ž jaho pryvieźli amal praz try hady paśla tych padziejaŭ.

Pavieł usio toj ža, tolki vusoŭ užo niama. Kažuć, zhalić paprasiła dziaŭčyna. Volha, Paŭłava niaviesta, tut ža.

Na pytańnie, kali viasielle, Sieviaryniec adkazvaje z uśmieškaj: «Pačakajcie krychu. Spačatku treba da jaje baćkoŭ źjeździć». «Choć sioleta?» «Pačakajcie krychu».

Pavieł kaža, što ciapier jaho zadača -- rychtavać «maralnuju revalucyju». Budzie nadalej pracavać na ŭmacavańnie Biełaruskaj Chryścijanskaj Demakratyi.

Ź pierona pieršaj spravaj Sieviaryniec pajšoŭ da aparniaka, vyzvalać zatrymanych. U milicyi sustrakać Paŭła adpravili nie aby-kaho, a načalnika minskaj milicyi Barsukova.

Pavieł nie pastaŭleny pad milicejski nahlad. Žyć jamu nie abaviazkova pa prapiscy ŭ Viciebsku, možna i ŭ Minsku.

Darečy, u aŭtorak na ŭpravie BNF budzie zładžana sustreča ź Sieviaryncam. Dla tych, chto nie zmoh siońnia, albo praspaŭ.

Źmicier Pankaviec

***

Uranku ŭ subotu, 19 kastryčnika, na svabodu vyjšaŭ jašče adzin palitviazień — lidar Biełaruskaj Chryścijanskaj Demakratyi Pavieł Sieviaryniec.

Na pieronie ŭ Minsku jaho sustrakali kala 30 čałaviek — u asnoŭnym žurnalisty niezaležnych ŚMI, paplečniki pa Chryścijanskaj Demakratyi i Maładym Froncie — Źmicier i Nasta Daškievičy, Mikoła Dziemidzienka, Vital Rymašeŭski.

9.27

Pavodle infarmacyi Biełaruskaj asacyjacyi žurnalistaŭ, zatrymanych na pieronie žurnalistaŭ vypuścili.

9.07

Pavieł Sieviaryniec paviedamiŭ «NN», što parazmaŭlaŭ na pieronie z načalnikam HUUS Minharvykankama Alaksandram Barsukovym. Toj pryhraziŭ zatrymańniem, kali na «vakzale budzie mitynh». Sieviaryniec kaža, što jamu paabiacali vyzvalić zatrymanych, kali jon źjedzie z vakzała.

8.46

Pa infarmacyi karespandenta «NN», na čyhunačnym vakzale prosta na pieronie zatrymali minimum 6 žurnalistaŭ: fotakarespandenta Siarhieja Hudzilina, karespandenta «Jeŭraradyjo» Alesia Pileckaha, fotakarespandenta Alaksandra Vasiukoviča, žurnalista Barysa Hareckaha, karespandenta BiełaPAN Zachara Ščarbakova z kaleham.

U časie zatrymańniaŭ da prysutnych, što sustrakali Sieviarynca źviarnuŭsia Vital Rymašeŭski. Jaho taksama zatrymali.

***

Pryčym, jak pieradaje karespandent «Našaj Nivy» Źmicier Pankaviec, vypuścili jaho nie a 10.00, jak robiać ź inšymi źniavolenymi na chimii ŭ Kuplinie, a raniej.

Kab ludzi nie sustreli jaho kala turmy, jaho padniali ŭnačy, vyvieźli na stancyju Arančycy i pasadzili na ciahnik numar 132B Brest-Maskva.

Pryčym kvitok na samoha palitviaźnia ŭziali, a na jahony bahaž — nie aformili. U ciahniku praz heta ŭźnikła sumiatnia, raskazaŭ nam Sieviaryniec.

Sieviaryniec paviedamiŭ, što a 8.42 jahony ciahnik prybyvaje ŭ Minsk.

36-hadovy Sieviaryniec zastavaŭsia ŭ źniavoleńni ad 2010 hoda.

Tady jaho, kiraŭnika štaba kandydata ŭ prezidenty ad Chryścijanskaj Demakratyi Vitala Rymašeŭskaha, aryštavali adrazu paśla Płoščy i źvinavacili ŭ padrychtoŭcy masavych biesparadkaŭ. Jon akazaŭsia adzinym kiraŭnikom štaba, jakoha sud adpraviŭ u turmu.

Hieołah pa prafiesii, vychadziec ź Viciebska Sieviaryniec zaniaŭsia palitykaj sa studenckich hadoŭ.

Jon byŭ suzasnavalnikam «Maładoha Frontu» — arhanizacyi moładzi, što paŭstała ŭ 1996 dla abarony niezaležnaści ad sprobaŭ anšlusu z Rasijaj.

Sieviaryniec byŭ arhanizataram šmatlikich demanstracyj i mitynhaŭ pratestu. Za heta jaho šmatkroć aryštoŭvaŭsia.

Pieršaje praciahłaje źniavoleńnie jon adbyŭ u 1998. U 2005—2007 jon siadzieŭ na prymusovych rabotach za arhanizacyju demanstracyi pratestu suprać padaŭžeńnia paŭnamoctvaŭ Alaksandra Łukašenki.

U 2010—2013 hadach jon siadzieŭ spačatku ŭ Minskaj turmie KDB, a paśla — u Pružanskim rajonie.

Sieviaryniec viadomy taksama jak publicyst. Jon łaŭreat premii imia Adamoviča za knihu «Listy ź lesu», jakuju jon napisaŭ u pieršaj svajoj ssyłcy, u hłuchoj vioscy Sitna na poŭnačy Połaččyny.

Mnohija ličać Sieviarynca patencyjnym kandydatam u prezidenty ad apazicyi. Adnak ułady mohuć nie zarehistravać jaho ŭ 2015 hodzie na padstavie niaźniataj sudzimaści.

* * *

Karespandenty «Našaj Nivy» viartajucca ŭ stalicu z paŭdarohi ŭ Kuplin.

Sačycie za padziejami praz NN.BY.

• 0
• 0
• 0
• 0
• 0
• 0
• 0
• 0