«Nastaŭniki stohnuć, ale prymaloŭvajuć nieabchodnyja ličby na vybarach»
AHP zładziła pres-kanfierencyju pa prablemach adukacyi.
Lidar Abjadnanaj hramadzianskaj partyi Anatol Labiedźka zajaviŭ na pres-kanfierencyi ŭ sieradu, što vyrašeńnie prablem sučasnaj biełaruskaj adukacyi źjaŭlajecca adnym z pryjarytetnych nakirunkaŭ dziejnaści partyi.
«Dla vychadu z tupika patrebna źmiena ŭsioj sistemy, patrebny sumlennyja vybary, parłamient, jaki sapraŭdy pracuje. Patrebny ŭdzieł biznesu ŭ pieraaryjentacyi adukacyi na sapraŭdnyja patreby. Tady budzie isnavać efiektyŭny kantrol za halinoju adukacyi i jaje jakaściu», — skazaŭ Labiedźka.
AHP zaklikaje raźvivać akademičnyja i ahulnahramadzianskija svabody, pryniać nieabchodnyja zachady dla dałučeńnia Biełarusi da Bałonskaha pracesu, namahacca pavysić sacyjalny status nastaŭnikaŭ u hramadstvie, abmiežavać pracoŭnuju nahruzku nastaŭnikaŭ i pazbavić ich sacyjalna-vychavaŭčaj pracy — dziela hetaha prapanujecca ŭvieści instytut piedahohaŭ-vychavalnikaŭ.
Realnyja ž kroki, zapłanavanyja AHP, bolš ścipłyja. «U AHP isnuje dobraja ekśpiertnaja baza ŭ pytańniach adukacyi.
Nieŭzabavie vyjdzie śpiecnumar haziety "Hołas rozumu", całkam pryśviečany prablemam biełaruskaj adukacyjnaj sistemy. Ź im my pojdziem u škoły, da nastaŭnikaŭ. U mianie na rukach pastanova ab spynieńni administratyŭnaj spravy supracy mianie za raspaŭsiud haziety la prachadnoj "Biełšyny", tamu, spadziajusia, ź jurydyčnaha punktu hledžańnia prablem u nas być nie pavinna.
Što budzie pa fakcie — pahladzim, — kaža Labiedźka. — Taksama my źbirajemsia supracoŭničać z Hramadskim Bałonskim kamitetam, a našaje moładzievaje adhalinvańnie "Maładyja demakraty" buduć pracavać sa studenctvam. My b vielmi chacieli, kab u kožnym VNU źjavilisia aktyvisty».
Śpikier AHP pa pytańniach adukacyi i były prarektrar BDU Anatol Paŭłaŭ nazvaŭ «druhim Čarnobylem» i «duchoŭnym tupikom» vyniki sioletniaj ustupnaj kampanii,
pa vynikach jakoj 36% abituryjentaŭ nie nabrali minimalnaha bału pa matematycy i fizicy.
«U Biełarusi isnavała mocnaja sistema adukacyi, ale ciapier jana znachozicca ŭ hłybokim kryzisie. I ciahniecca jon užo nie adzin dziasiatak hadoŭ. Heta ŭ mnohim vynik astatkavaha pryncypu finansavańnia śfiery adukacyi, kali pryjarytet addajecca siłavym strukturam i čynoŭnikam», — skazaŭ Paŭłaŭ.
Na dumku Paŭłava, rezkaje pavieličeńnie biudžeta adukacyi moža dać vynik: spynić adtok kadraŭ i viarnuć u adukacyju vysokakłasnych śpiecyjalistaŭ.
«Kali kazać pra zachady, jakija demsiły mohuć rabić u siońniašniaj situacyi, heta, pa-pieršaje, praca z nastaŭnikami. Heta tyja ludzi, jakija ciapier stohnuć, ale ŭ toj samy čas prymaloŭvajuć nieabchodnyja ličby na vybarach, — adznačyŭ Paŭłaŭ, majučy na ŭvazie, što vybarčyja kamisii składajucca ŭ asnoŭnym z pracaŭnikoŭ śfiery adukacyi. — Kali jany salidaryzujucca i nie buduć udzielničać u falsifikacyjach, situacyja maje šaniec palepšycca».
Kamientary