Nie stała mastački Aleny Łoś
Tysiačy biełaruskich dziaciej vyraśli, čytajučy ilustravanyja joj kazki.
U Minsku 14 lipienia pamierła talenavitaja mastačka Alena Łoś. U lutym jana adznačyła 80-hodździe.
Alena Łoś naradziłasia ŭ Vilni. Skončyła Vilenski dziaržaŭny mastacki instytut. Ad 1963 źjaŭlałasia siabram Biełaruskaha sajuza mastakoŭ. Jana azdablała knihi biełaruskich narodnych kazak «Och i załataja tabakierka» (1967), «Z roha ŭsiaho mnoha» (1968), knižki Alesia Jakimoviča «Vierabjinyja hości» (1960), Vasila Vitki «Dudaryk» (1965), Źmitraka Biaduli «Skarb» (1966), Aviarjana Dzieružynskaha «Kuju-kuju nožku» (1967), Niła Hileviča «Zahadki» (1971), Uładzimira Jahoŭdzika «Babulina varta» (1999), «Słova pra pachod Iharavy» (1986) i dziasiatki inšych knih. Mastačka pracavała taksama i ŭ stankovaj hraficy. Adna za adnoj źjaŭlalisia cełyja sieryi jaje linarytaŭ: «Dzieci Biełaviežy» (1966), «Ludzi na Prypiaci» (1973), «Radaść pracy» (1976). Nie abminuła Alenu Łoś i zachapleńnie litahrafijaj. Jana stvaryła cykł kalarovych litahrafij pa matyvach biełaruskaha falkłoru i paezii Janki Kupały, a taksama pavodle paleskich vandrovak.
Šmat tvoraŭ Aleny Łoś siońnia zachoŭvajecca ŭ Nacyjanalnym mastackim muziei Biełarusi ŭ Minsku, u Dziaržaŭnaj Traciakoŭskaj halerei ŭ Maskvie, u Pružanskim pałacyku-muziei, u Litaraturnych muziejach Janki Kupały i Jakuba Kołasa ŭ Minsku, u miemaryjalnym muziei Alaksandra Puškina ŭ Maskvie i ŭ inšych muziejach i halerejach.
Kamientary