Piać biełaruskich hurtoŭ trapili na składanku «Rok-tancy słavian»

Niadaŭna biełaruski łejbł Vigma vydaŭ dysk «Rok-tancy słavian». U kampanii z «Okieanom Jelzi», «Voplami Vidoplasova», Gogol Bordello dy inšymi zamiežnymi słavutaściami «tańčać» biełaruskija hurty: «Pałac», «Krambambula», «Troica», Hurma, Chiefs Band.

12 kalektyvaŭ i artystaŭ ź Biełarusi, Ukrainy, Małdovy, Sierbii i navat z ZŠA sabralisia na adnym dysku. Jak ładzilisia takija mižnarodnyja tancy, raspavioŭ Alaksiej Bandasarjan, načalnik adździeła asartymienta kampanii Vigma:

— Klučavoje słova tam «słavianie». Ja padbiraŭ kampazicyi, kab adčuvaŭsia drajv, fiška. Luby zbornik ja starajusia ŭsprymać jak słuchač, jaki budzie nabyvać hety dysk. Kab jamu było i viesieła, i sumna.

— Na dysku pradstaŭlena davoli šyrokaja hiehrafija. Nie tolki Biełaruś, Ukraina, ale i Sierbija, Małdova, navat u ZŠA zavitali razam z Gogol Bordello.

— Tut atrymaŭsia taki mižnarodny kancert. Dzie nichto nie hublajecca na fonie astatnich. Na dysku jość imiony novyja, a jość i viadomyja kalektyvy. Niechta adkryje dla siabie Gogol Bordello, niechta adkryje dla siabie hurt Hurma. Chtości kupić dysk tolki za adnu «Viesnu» «Voplej Vidoplasova» i adkryje dla siabie dziesiać novych kalektyvaŭ.

Małady biełaruski hurt Hurma na dysku pradstaviŭ ažno dźvie kampazicyi: «Šukaj» i «Kłub samotnych sercaŭ». Jak chłopcy siabie adčuvajuć u takoj słavutaj kampanii, raspavioŭ lidar hurta Mikita Najdzionaŭ:

— Mnohija hetyja hurty hučać daŭno ŭ maim płejery, tamu patrapić u taki płejlist dla nas vialikaje ščaście. Asabliva pryjemna, kali razumieješ, što paśla ciabie śpiavaje «Bumboks», a pierad taboj idzie Gogol Bordello.

— Nakolki ja viedaju, heta ŭsie pieśni, što vy pakul prezientavali. Kali čakać navinak?

— Sapraŭdy, možna skazać, na hetaj płycie padstaŭlena ŭsia tvorčaść Hurma:) Ale bližejšym časam dapisvajem novuju pieśniu. Mnie jana pa nastroi niečym nahadvaje «Okiean Jelzi». Chacia, spadziajusia, Hurma ŭ joj budzie bolš. Dumaju, napačatku sakavika budzie premjera.

Ci jość naohuł takaja źjava, jak słavianski rok, adkazaŭ Aleh Chamienka, lidar hurta «Pałac»:

— Kaniečnie, heta spałučeńnie krychu dziŭnavataje. Ja ŭjaŭlaju, što heta rok-muzyka ŭ žanry «rok na słavianskich movach».

— Jak vam znachodzicca ŭ takoj muzyčnaje kampanii z nazvanymi hurtami?

— Na svaje vočy ja dyska šče nie bačyŭ, ale toje, što mnie pieraličyli, padajecca, vielmi hodnaja kampanija.

— Ci davodziłasia vam vystupać z kim-niebudź ź ich na adnoj scenie?

— Kaniečnie, amal z usimi, akramia Gogol Bordello. Značnaja častka hurtoŭ, jakija pradstaŭleny na hetym kampakcie, jak ja zrazumieŭ, maje siabry, paplečniki. Zaŭsiody pavitajemsia, raspaviadziem pra žyćcio, pra niejkija płany.

— Skažycie, čamu amierykanski ci brytanski rok suśvietna viadomyja, a voś słavianski rok jašče nie nastolki raspaŭsiudžany?

— Jany viadomyja ŭ anhłamoŭnym suśviecie, a słavianski rok viadomy ŭ słavianamoŭnym suśviecie. Jość jašče i arabski, i kitajski rok, ale jon viadomy na peŭnaj moŭnaj terytoryi.

Nabyć dysk «Rok-tancy słavian» možna ŭ hipiermarkietach «Hippo» i ProStore.

• 0
• 0
• 0
• 0
• 0
• 0
• 0
• 0