Paśla hatyčnych komiksaŭ Tyma Biortana kinaseryjał «Betmen» vydychnuŭsia — i na reanimacyju superhieroja zaprasili talenavitaha režysera Krystafera Nołana, jaki prasłaviŭsia vykštałconym tryleram «Pamiataj».
Rolu Betmena prapanavali aktoru Krystaferu Bejłu, jaki maje niebłahi dośvied u stvareńni charaktaraŭ z «dvajnym dnom» («Amerykanski psychapat», «Mašynist»).
Padobny vybar zabiaśpiečyŭ komiksu niečakanuju psychalahičnuju hłybiniu i zmročna-realistyčnuju, psychijatryčna-fantazijnuju atmasferu.
U karcinie «Betmen: pačatak» apaviadajecca, jak miljarder Brus Uejn dajšoŭ da načnoha žyćcia, pačaŭšy lotać nad horadam Hotchamam. Pryčyna — traŭma dziacinstva, kali baćki Ŭena byli zabityja lichadziejem, a chłopčyk byŭ napałochany rukakryłymi.
U niedaravalna nudnym pačatku filmu Brus Uejn adnaŭlaje spraviadlivaść (u turmie), pakutuje — i traplaje ŭ Lihu cieniaŭ, dzie navučajecca roznym fokusam. Ale tolki kinuŭšy kampaniju nindzia-psychapataŭ (na čale z Łajamam Nisanam), hieroj znachodzić siabie, viartajecca ŭ Hotcham — i raspačynajecca sapraŭdnaje dziejańnie.
Pakarańnie kryminalnikaŭ, narkotyki, dziŭnaja zbroja i intryhi pa atručvańni haradzkoj kanalizacyi, betmamabil-tank — i mudry Morhan Frymen u jakaści hienijalnaha vynachodnika. Cikava, što Hiery Ołdman zaśviaciŭsia ŭ niazvykłaj dla siabie roli dobraha palicejskaha. Majecca j ramantyčnaja linija, ale cikaviejšyja psychijatryčnyja kašmary i ŭvasoblenyja žachi.
Niekatoryja sceny davoli vidoviščnyja, a epizod z kažanami ŭ piačory, kali ich lichamankavaja čarada ablaplaje Krystafera Bejła, — prosta vydatny.
Amerykancy, jak zaciatyja indyvidualisty, ad karciny ŭ zachapleńni. Dla biełaruskaha hledača heta trochi čužoje śviata, ale kinošnaje i zusim nia sumnaje.
∎
«Betmen: pačatak» («Batman Begins»)
ZŠA, 2005, kalarovy, 140 chv.
Žanr: psychalahičny komiks, tryler, pryhody.
Adznaka: 5,5 (z 10).
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary