Пасьля гатычных коміксаў Тыма Бёртана кінасэрыял «Бэтмэн» выдыхнуўся — і на рэанімацыю супэргероя запрасілі таленавітага рэжысэра Крыстафэра Нолана, які праславіўся выкшталцоным трылерам «Памятай».
Ролю Бэтмэна прапанавалі актору Крыстафэру Бэйлу, які мае неблагі досьвед у стварэньні характараў з «двайным дном» («Амэрыканскі псыхапат», «Машыніст»).
Падобны выбар забясьпечыў коміксу нечаканую псыхалягічную глыбіню і змрочна-рэалістычную, псыхіятрычна-фантазійную атмасфэру.
У карціне «Бэтмэн: пачатак» апавядаецца, як мільярдэр Брус Уэйн дайшоў да начнога жыцьця, пачаўшы лётаць над горадам Готхамам. Прычына — траўма дзяцінства, калі бацькі Ўэна былі забітыя ліхадзеем, а хлопчык быў напалоханы рукакрылымі.
У недаравальна нудным пачатку фільму Брус Уэйн аднаўляе справядлівасьць (у турме), пакутуе — і трапляе ў Лігу ценяў, дзе навучаецца розным фокусам. Але толькі кінуўшы кампанію ніндзя-псыхапатаў (на чале з Лаямам Нісанам), герой знаходзіць сябе, вяртаецца ў Готхам — і распачынаецца сапраўднае дзеяньне.
Пакараньне крымінальнікаў, наркотыкі, дзіўная зброя і інтрыгі па атручваньні гарадзкой каналізацыі, бэтмамабіль-танк — і мудры Морган Фрымэн у якасьці геніяльнага вынаходніка. Цікава, што Геры Олдман засьвяціўся ў нязвыклай для сябе ролі добрага паліцэйскага. Маецца й рамантычная лінія, але цікавейшыя псыхіятрычныя кашмары і ўвасобленыя жахі.
Некаторыя сцэны даволі відовішчныя, а эпізод з кажанамі ў пячоры, калі іх ліхаманкавая чарада абляпляе Крыстафэра Бэйла, — проста выдатны.
Амэрыканцы, як зацятыя індывідуалісты, ад карціны ў захапленьні. Для беларускага гледача гэта трохі чужое сьвята, але кіношнае і зусім ня сумнае.
∎
«Бэтмэн: пачатак» («Batman Begins»)
ЗША, 2005, каляровы, 140 хв.
Жанр: псыхалягічны комікс, трылер, прыгоды.
Адзнака: 5,5 (з 10).
Цяпер чытаюць
Сталі вядомыя падрабязнасці пра трагедыю ў Полацкім манастыры16
Сталі вядомыя падрабязнасці пра трагедыю ў Полацкім манастыры
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары