Палітзняволеную іранскую нобелеўскую лаўрэатку тэрмінова шпіталізавалі
Іранскую праваабаронцу і лаўрэатку Нобелеўскай прэміі міру 2023 года Наргес Махамадзі тэрмінова шпіталізавалі пасля рэзкага пагаршэння стану здароўя ў турме, паведамляе Reuters.
Як паведамляецца, у жаночай турме ў горадзе Зенджан у 54‑гадовай Наргес Махамадзі здарыўся цяжкі прыступ на фоне вельмі высокага артэрыяльнага ціску, млоснасці і страты прытомнасці. Стан ацэньваецца як вельмі рызыкоўны для жыцця.
Спачатку жанчыну даставілі ў мясцовую бальніцу, але яе сваякі і праваабарончыя структуры сцвярджаюць, што стан працягвае заставацца крытычным. Паводле іх слоў, улады Ірана не дазваляюць перавесці Махамадзі ў Тэгеран, дзе яе маглі б агледзець дактары, якім давярае сям’я.
Таксама паведамляецца, што ў яе былі сімптомы праблем з сэрцам, рэзкія скачкі ціску, прыступы трывогі і моцныя болі ў грудзях. Раней Наргес Махамадзі ўжо страчвала прытомнасць у турме.
Нобелеўскі камітэт і праваабарончыя арганізацыі выказвалі занепакоенасць яе станам яшчэ да шпіталізацыі. Махамадзі вядомая як актывістка, якая выступае супраць дыскрымінацыі жанчын, смяротнага пакарання і парушэнняў правоў чалавека ў Іране.
Яна неаднаразова арыштоўвалася і правяла ў зняволенні шмат гадоў. На момант прысуджэння Нобелеўскай прэміі яна таксама знаходзілася ў турме.
Цяпер міжнародныя арганізацыі патрабуюць забяспечыць жанчыне паўнавартасную медыцынскую дапамогу па-за турэмнымі ўмовамі і доступ незалежных дактароў.
Наргес Махамадзі знаходзіцца ў зняволенні з канца 2021 года, а ў лютым 2026 года яе асудзілі па новым абвінавачанні на 7 з паловай гадоў зняволення.
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары