Ichnaja relihija naradziłasia ŭ siaredzinie XIX st. u Persii. Ichni hałoŭny chram — u izrailskaj Chajfie, kudy kožny viernik maje schadzić
u dzieviacidzionnuju pilihrymku chacia b raz u žyćci. Jany molacca, paviarnuŭšysia tvaram da Chajfy, nia majuć śviataroŭ. Jany nosiać zvyčajnuju vopratku. Miesiac tamu ŭbačyli śviet malitvy bachai pa-biełarusku.
Bachai (nacisk na apošni skład) — arabskaje słova, što aznačaje «śviatło, słava, vielič». Relihijnaje abjadnańnie bachai ŭ Biełarusi maje piać zarehistravanych supołak (Bieraście, Viciebsk, Homiel, Miensk, Mahiloŭ) i čatyry niezarehistravanyja — ahułam blizu 400 čałaviek u 41 pasieliščy. Adziny na ŭsiu Eŭropu chram bachai — u Frankfurcie-na-Majnie, choć jany majuć supołki ŭ 188 krainach dy naličvajuć kala 5 młn prychilnikaŭ.
U Biełarusi pieršy viernik bachai źjaviŭsia ŭ 1978 h.: inžyner-elektronščyk Helmut Vinkielbach ažaniŭsia z savieckaj hramadziankaj i pierajechaŭ siudy ź Niamieččyny. U toj čas jamu davodziłasia maŭčać pra svajo vieravyznańnie. Pieršy biełaruski bachai źjaviŭsia tolki ŭ 1989 h. U 1992 h. vierniki zarehistravali pieršuju supołku z 30 čałaviek. Najbolšaha rostu (da 400 darosłych čalcoŭ) supołki bachai dasiahnuli ŭ 2000 h. Ciapier, kaža čalec Duchoŭnaha schodu bachai Biełarusi Vasil Kiślak, jość tendencyja da źnižeńnia kolkaści: moładź vyjaždžaje za miažu, supołki nia majuć mahčymaści vieści aktyŭnuju prapahandu.
Pierakład śviatych tekstaŭ na biełaruskuju — sprava, vielmi važnaja dla bachai. Niezdarma jany i sajt (www.bahai.by) majuć pa-biełarusku. «Zasnavalniki relihii zaachvočvali nas da pierakładaŭ na ŭsie movy śvietu. Da taho ž, kali my pierakładajem hetyja teksty na inšuju movu, to jana atrymlivaje šturšok da raźvićcia», — kaža V.Kiślak. Pierakłady dla biełaruskaha vydańnia byli zrobleny z anhielskaj: «ucarkaŭlonych» pierakładčykaŭ z aryhinału na arabskaj i farsi biełaruskija bachai nie znajšli.
Malitvy azdobleny vycinankami mastački Iryny Sazonavaj (analahičnyja rasiejskaje i ŭkrainskaje vydańni vychodzili biez mastackaha azdableńnia). Pavodle słoŭ V.Kiślaka, nacyjanalnaja samabytnaść dla bachai — vielmi važny momant: na ŭsie zamiežnyja sustrečy biełaruskaja delehacyja vyjaždžaje ŭ nacyjanalnych strojach. U nacyjanalnych tradycyjach azdobleny taksama padarunki biełaruskaha abjadnańnia, dasłanyja ŭ hałoŭny chram u Chajfie.
Kamientary