Дарадца Наўседы: Збіты ўначы над Літвой беспілотнік, імаверна, адхіліўся ад курсу
Пакуль няясна, расійскі ці ўкраінскі быў дрон.
Пасля таго, як у ноч на аўторак знішчальнікі НАТА збілі беспілотнік у Кайшадорскім раёне, галоўны дарадца прэзідэнта Літвы па пытаннях нацыянальнай бяспекі Дэйвідас Матулёніс заявіў, што дрон, верагодна, збіўся з курсу, піша LRT.
Паводле яго слоў, цяпер незразумела, быў гэта расійскі ці ўкраінскі беспілотнік.
«Хутчэй за ўсё, гэта расійскі або ўкраінскі дрон, які адхіліўся ад курсу, але на сённяшні дзень мы не можам адказаць дакладна», — сказаў Матулёніс у аўторак у інтэрв'ю радыёстанцыі Ziniu radijas.
«Магчымы і варыянт, што ён быў спецыяльна запушчаны на тэрыторыю Літвы. Адказаць на гэта павінна расследаванне», — адзначыў чыноўнік.
Ён папярэдзіў, што колькасць падобных інцыдэнтаў можа ўзрасці. Каментуючы паведамленні ў сацыяльных сетках пра тое, што гук беспілотніка быў чутны яшчэ да афіцыйнай заявы ўладаў, дарадца прэзідэнта назваў гэта нармальнай сітуацыяй.
Паводле яго слоў, з моманту выяўлення радарамі аб'екта, які ляціць, да рассылкі папярэджанняў жыхарам праходзіць пэўны час, паколькі рашэнне аб гэтым прымаецца на падставе вызначаных крытэрыяў.
«Гэта пытанне некалькіх хвілін. Хто заўважыў першым — жыхар ці вайскоўцы, — прынцыповага значэння не мае», — сказаў Матулёніс.
Каментары