У лесе пад Берлінам знайшлі тайнік са зброяй. Разведка Германіі лічыць, што яна прызначалася для забойстваў па заказе Расіі

Міністр унутраных спраў Германіі Аляксандр Добрынт паведаміў на прэс-канферэнцыі, што ў кастрычніку мінулага года ўнутраная разведка атрымала звесткі пра схованку са зброяй на ўскраіне Берліна.

Супрацоўнікі спецслужбы разам з паліцыяй устанавілі месцазнаходжанне тайніка і знайшлі ў ім два пісталеты і запас патронаў.

Паводле слоў Добрынта, зброя была прыведзена ў непрацоўны стан.

Спецслужбы на працягу некалькіх месяцаў сачылі за тайніком, аднак да яго так ніхто і не прыйшоў.

«Гэты выпадак дэманструе, што нам даводзіцца працаваць ва ўмовах высокага ўзроўню пагрозы», — заявіў пры гэтым міністр.

Што вядома пра падазраванага, затрыманага ў Румыніі

Як паведаміў міністр унутраных спраў Германіі, пракуратура вывучае магчымае дачыненне да гэтай справы чалавека, які быў затрыманы ў Румыніі па падазрэнні ў планаванні нападаў з прымяненнем выбуховых прылад у пасылках.

Добрынт не ўдакладніў грамадзянства падазраванага, але апісаў яго як «агента нізкага ўзроўню», які не ведаў усяго свайго кіраўніцтва. Ён дадаў, што ў гэтым годзе было затрымана ўжо некалькі такіх патэнцыйных выканаўцаў, у тым ліку грамадзянін Казахстана.

Крыніца агенцтва AFP у румынскай паліцыі паведаміла, што ў дачыненні да берлінскага тайніка са зброяй падазраецца адзін з двух грамадзян Украіны, якія былі арыштаваныя ў Румыніі ў кастрычніку мінулага года па абвінавачанні ў арганізацыі нападаў па заказе Расіі.

У той час паліцыя Румыніі казала, што два ўкраінцы ва ўзросце ад 20 да 30 гадоў прыбылі ў Бухарэст з Польшчы і «перадалі ў офіс міжнароднай кур'ерскай кампаніі дзве пасылкі, якія ўтрымлівалі самаробныя прылады». «Іх мэтай было знішчэнне гэтага будынка пры дапамозе падпалу», — паведамлялася ў паліцэйскім прэс-рэлізе.

Румынская знешняя разведка заявіла, што гэтыя грамадзяне Украіны былі звязаныя «з шырокай дыверсійнай сеткай, накіраванай супраць еўрапейскіх краін і падкантрольнай расійскім спецслужбам».

Улады Румыніі сцвярджалі, што «папярэдзілі новую дыверсійную аперацыю, якую Расійская Федэрацыя арганізавала на румынскай тэрыторыі».

Што прэса піша пра сувязь тайніка з Расіяй

Як паведамляе газета Süddeutsche Zeitung і тэлекампаніі NDR і WDR са спасылкай на крыніцы ў Федэральным ведамстве па ахове канстытуцыі Германіі (BfV), гэта спецслужба лічыць, што тайнік са зброяй належаў расійскай разведцы.

«Службы бяспекі Германіі перакананыя, што зброя прызначалася для агентаў, якія па даручэнні Масквы павінны былі ажыццяўляць так званыя «кінэтычныя аперацыі» ў краіне, інакш кажучы — забойствы», — сказана ў публікацыях.

Журналісты нагадваюць, што кіраўнік BfV Сенан Селен ужо доўгі час «папярэджваў на сакрэтных нарадах у Берліне, што расійскія спецслужбы актывізавалі сваю тактыку і цяпер плануюць заказныя забойствы ў Германіі».

«У спіс цэляў Масквы, паводле паведамленняў, уключаны кіраўнікі абароннай індустрыі, апазіцыйныя фігуры ў выгнанні і розныя прыхільнікі Украіны», — адзначаюць аўтары публікацыі.

Пасольства Расіі ў Германіі не адказала на просьбы журналістаў пракаментаваць гэтыя сцвярджэнні.

На прэс-канферэнцыі ў пятніцу Добрынт адмовіўся пацвердзіць паведамленні пра тое, што тайнік са зброяй быў звязаны з Расіяй, аднак заявіў, што не выключае «дачынення замежных дзяржаў».

Як нагадвае карэспандэнт ВВС, улады Германіі падазраюць Расію ў арганізацыі серыі нападаў на тэрыторыі краіны.

У 2024 годзе тэлекампанія CNN паведаміла, што Масква планавала забойства кіраўніка найбуйнейшага германскага абароннага канцэрна Rheinmetall Арміна Папергера. Палітыкі Германіі былі шакаваныя і запатрабавалі ад улад рашучых дзеянняў.

У 2021 годзе суд у Германіі прысудзіў грамадзяніна Расіі і спецназаўца ФСБ Вадзіма Красікава да пажыццёвага зняволення за забойства ў берлінскім парку былога чачэнскага палявога камандзіра Зелімхана Хангашвілі.

• 1
• 0
• 0
• 0
• 0
• 0
• 2
• 0