Прэзідэнт ЗША Дональд Трамп заявіў, што новыя перамовы з Іранам пачнуцца ў панядзелак пасля таго, як ён адмяніў, паводле яго слоў, «маштабныя» ўдары па краіне. Іран пакуль не пацвердзіў ні дату перамоў, ні сваю гатоўнасць да іх, піша Бі-бі-сі.
«Яны ведалі маштаб атакі, бо бачылі, як яна рыхтавалася», — сказаў Дональд Трамп журналістам на борце самалёта Air Force One. «Мы вядзём з імі перамовы. Яны пачнуцца ў панядзелак пасля абеду».
Раней у сацыяльнай сетцы Truth Трамп напісаў, што Іран і саюзнікі ЗША на Блізкім Усходзе папрасілі яго «ўстрымацца» ад любых нападаў, паколькі «асноўныя ўмовы» пагаднення ўжо былі ўзгоднены.
Іран пакуль не адрэагаваў на заявы Трампа. Прэзідэнт ЗША неаднаразова сцвярджаў, што мірнае ўрэгуляванне ўжо блізкае, аднак пасля гэтага адбываліся новыя ўдары.
У размове з журналістамі на борце прэзідэнцкага самалёта Трамп адмовіўся назваць крайні тэрмін заключэння пагаднення з Тэгеранам: «Пабачым, як усё складзецца. Мы гатовыя дзейнічаць у любы момант. Я не збіраюся забіваць людзей».
Трамп таксама дадаў, што наследны прынц Саудаўскай Аравіі Мухамед бін Салман, а таксама партнёры ЗША, найперш Аб'яднаныя Арабскія Эміраты і Катар, заклікалі яго ўстрымацца ад новых удараў у выхадныя дні.
«Мы былі цалкам гатовыя да перамоў», — сказаў Трамп. «Прычына, па якой яны прасілі, заключаецца ў тым, што яны лічаць: пагадненне ўжо заключана», — адзначыў ён. «Пагадненне адносна Армузскага праліва ўжо ёсць, і будзе заключана таксама пагадненне па ядзернай праграме», — заявіў прэзідэнт ЗША.
Пасля заяў Трампа аб перамовах на азіяцкіх таргах знізіліся сусветныя цэны на нафту. Кошт нафты маркі Brent упаў на 4,5% — да 83,98 даляра за бараль, а кошт амерыканскай нафты — на 4,6%, да 80,74 даляра за бараль.
Каментары