Тэлефонныя махляры перайшлі да выкупаў за дзяцей — раскажыце пра гэту схему блізкім
Ахвярай новай складанай схемы махлярства стала мінская сям'я. Злачынцы патрабавалі ў шакаваных бацькоў выкуп за «вызваленне» дачкі, а дзяўчынку змусілі збегчы з дому і схавацца.
Гісторыя пачалася са званка дзяўчынцы нібыта ад супрацоўніка «Вайлдберыз», што яе тавары прывезлі не ў той пункт выдачы. І каб адаслаць пасылкі ў найбліжэйшы пункт, трэба агучыць свой электронны адрас пошты і шасцізначны код. Атрымаўшы доступ да звестак дзяўчынкі, аферысты пад выглядам сілавікоў пераканалі 15‑гадовую дзяўчынку, што яна стала фігуранткай справы аб адмыванні грошай.
«Звязаліся з куратарам нібыта МУС. Там куратар МУС таксама мяне праінфармаваў, што мне і маім бацькам пагражае 7 ці 15 гадоў турмы, калі гэта ўсё праўда, і што я праўда фінансую тэрарызм. Аказваецца, праз гэтую ўцечку звестак у мяне нібыта адкрыўся новы рахунак, і там як бы адмывалі грошы», — расказвае дзяўчынка.
Калі яна паведаміла пра адсутнасць у яе грошай, то для «выратавання сям’і» ёй прапанавалі паўдзельнічаць у спецаперацыі.
Падлетак на загад аферыстаў з'ехала з горада, адключыла мабільны тэлефон і дастала сім-карту. Школьніцу запэўнілі, што яе тэлефон праслухоўваюць і гэта неабходныя меры засцярогі.
Пакуль дзяўчынка была без сувязі, махляры пачалі атакаваць яе маці.
«Пазваніў, сказаў, што ваша дзіця ў нас. У тэлеграм даслалі яе фотаздымак. Ну проста гэта яна! І ў кофце яе, і ў джынсах. Ён піша: «Прывітанне, Каця, пазнаеш? Чым далей ты і Сярожа будзеце думаць, дачушка ваша будзе ўсё далей і далей ад Мінска», — расказала маці.
Жанчыне дасылалі фотаздымкі дачкі ў салоне аўто і пагражалі вывезці яе з краіны, калі маці не пералічыць грошы на крыптакашалёк:
«Пайшлі пагрозы, што мы зараз яе вывозім з Мінска, і вы павінны перавесці ў найкарацейшыя тэрміны — мне далі гадзіну — на крыптавалюту, на нейкі крыптакашалёк».
Невядомы пытаўся, на колькі заяўніца ацэньвае жыццё свайго дзіцяці. Ёй даслалі фотаздымкі дзяўчынкі і пакояў іх кватэры.
Жанчына звярнулася ў міліцыю. Супрацоўнікі Фрунзенскага РУУС знайшлі дзяўчынку ў пасёлку Валяр’янава.
МУС заклікае бацькоў растлумачыць дзецям, што любыя патрабаванні перадаць коды з SMS ці ўдзельнічаць у «сакрэтных праверках» з'яўляюцца прыкметай злачынства.
Каментары