Пуцін пракаментаваў відэа Зяленскага з Купянска, які расейцы абвесцілі акупаваным
«Ну чаго стаяць на парозе? Заходзь у дом».
Падчас сённяшняй прамой лініі Пуціна журналіст задаў яму пытанне пра відэа Уладзіміра Зяленскага з Купянска, які Расія абвесціла акупаваным. Тое відэа расійская прапаганда называла старым, а візіт — інсцэніроўкай.
«Калі гэта сапраўды фэйк, то як жа Зяленскі мог адважыцца вось на падлог такога маштабу ў гэты адказны момант?» — спытаў расійскі журналіст.
«Я не ведаю, я за гэтым не сачу. Ён жа артыст. І артыст таленавіты. Я кажу без аніякай іроніі. Мы ведаем гэта і па яго фільмах у ранейшыя часы. Таму тут нічога незвычайнага няма. Ну, кажуць, што стэла зараз зусім па-іншаму выглядае. Але рэч не ў гэтым. Стэла знаходзіцца ад самога горада недзе на адлегласці кіламетра прыкладна. Ну чаго стаяць на парозе? Заходзь у дом. Правільна?» — выказаўся Уладзімір Пуцін.
Нагадаем, 12 снежня Зяленскі выклаў відэа каля ўезду ў Купянск. Яно было знятае на тэлефон iPhone17 Pro, які з'явіўся ў продажы некалькі месяцаў назад. Зяленскі паведаміў пра наведванне перадавога каманднага пункта 14‑й асобнай механізаванай брыгады. Паводле звестак OSINT-даследчыкаў, месца здымкаў знаходзілася ў непасрэднай блізкасці да фронту: прыкладна за 1,15 км ад расійскіх пазіцый і ўсяго за 500 метраў ад так званай «шэрай зоны».
Да яго прыезду расіяне заяўлялі пра акружэнне горада. Пазней стала вядома, што ўкраінцы контратакавалі пад Купянскам, расійскія войскі трапілі ў акружэнне. У выніку паспяховай аперацыі ўкраінскіх Сіл абароны праціўнік быў заблакаваны ў Купянску і зачышчаная ўся паўночна-заходняя ўскраіна горада.
Пасля візіту Зяленскага ў Купянск з'ездзілі і дзве ўкраінкі і выклалі відэа.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі
Каментары